Афғонистонда Британия армияси билан ҳамкорлик қилган ҳамда «Толибон» ҳокимятга келгач мамлакатдан эвакуация қилинган барча афғонлар Британия ҳукумати қарори билан, «Илиқ кутиб олиш» операцияси доирасида ҳеч қандай чекловларсиз Буюк Британияда қолиши мумкин бўлади. Бу ҳақда Буюк Британия ҳукумати сайтида эълон қилинган пресс-релизга таяниб, «Интерфакс» хабар берди.
Ҳужжатда айтилишича, ушбу афғонларнинг барчаси «ҳаётини тиклаш, иш топиш, ўқишни давом эттириш ва маҳаллий жамоаларга қўшилиш учун зарур бўлган муҳим ёрдамни олиши керак».
Буюк Британия бош вазири Борис Жонсоннинг баёнотида шундай дейилади: «Биз Афғонистонда Қуролли Кучларимиз билан ишлаганлардан чуқур қарздормиз, мен уларга ва уларнинг оилаларига Буюк Британияда ўз ҳаётини тиклаш учун зарур ёрдамни кўрсатишга қарор қилдим».
«Мен бу давр жуда қийин бўлишини биламан, лекин умид қиламанки, улар Британия жамоатчилиги томонидан билдирилган қўллаб-қувватлаш ва саховат тўлқинидан жасорат олади», — дея қўшимча қилди бош вазир.
Ҳукумат пресс-релизда маълум қилинишича, афғонистонлик болаларга қўшимча мактаб ўринларини яратиш учун камида 12 миллион фунт ажратилади, Буюк Британия университетларида афғонистонлик талабалар ва аспирантлар учун 300 тагача стипендия ажратилади. Ушбу тоифадаги афғонларнинг соғлиқни сақлаш хизматларидан фойдаланиши учун қўшимча 3 миллион фунт ажратилган ва уларнинг барчасига COVID-19 га қарши вакцина таклиф қилинган.
Изоҳ (0)