«Толибон» ҳаракати Панжшер вилоятидаги аванпортга ҳужум қилди. Бу ҳақда «Толибон»га қаршилик кучлари етакчиси кичик Аҳмад Масъудга яқин манбасига таяниб, ТОLО News хабар берган.
Агентлик манбасига кўра, қаршилик кучлари ҳужумни қайтара олган. Айни пайтда «Толибон» ва қаршилик кучлари ўртасидаги жанглар давом этмоқда.
«ТАСС»нинг вилоятдаги манбаси маълум қилишича, ҳужум ҳудуднинг ғарбий қисмида юз берган. Унинг айтишича, «Толибон» аъзолари орасида ҳалок бўлганлар ва яраланганлар бор.
Баъзи ОАВларга кўра, ўтган тунда АҚШ Афғонистондан ўз қўшинларини олиб кетишни якунлаши фонида «Толибон» Панжшер водийсига иккита йўналишда: Бағлон вилоятидаги Андараб водийси томонидан ҳамда Жабал-ус-Сирож шаҳри томонидан ҳужум қилган.
«Толибон» Андараб йўналишидаги жангларда 85 аскарини йўқотган, 108 нафари яраланган. Жабал-ус-Сирож яқинидаги тўқнашувларда эса 12 жангари ҳалок бўлиб, 26 киши жароҳатланган.
Панжшер ҳимоячилари орасида ҳам ярадорлар борлиги маълум қилинмоқда.
«Толибон» ҳаракати бу маълумотни изоҳлаганича йўқ.
АҚШ ва иттифоқдошлари ўз қўшинларини олиб кетишни бошлаганидан кейин «Толибон» ҳужумга ўтишни бошлаганди. Улар йирик шаҳарларни бирин-кетин эгаллаб, 15 август куни Кобулга етиб келди. Панжшер ҳозиргача жангарилар назорати остига ўтмаган ягона вилоят бўлиб қолмоқда. У ерда ўзини давлат раҳбари деб эълон қилган вице-президент Амрулла Солиҳ ҳам жойлашиб олган.
22 август куни жангарилар панжшерликларга ультиматум эълон қилиб, тўрт соат ичида таслим бўлишни талаб қилди. Масъуд Панжшер етакчилари вилоятни топшириб қўймаслигини билдирди. Кейинроқ «Толибон» ҳудудга юзлаб жангчиларни юборганини маълум қилиб, вилоятни қамал қилишни бошлади. Жангарилар Панжшер аҳолисини интернетдан узиб қўйди, ҳудудда мобил алоқа ишлашдан тўхтади.
Масъуд воқеалар ривожи тинч бўлишига умид билдирди, аммо «ҳарбий вариант»ни ҳам истисно қилмади ва қаршилик кучлари эҳтимолий ҳужумларни қайтаришга тайёрланаётганини қайд этди.
Изоҳ (0)