Америка армияси ўз контингентини Афғонистондан олиб чиқишни якунлади. Бу ҳақда CNN АҚШ Қуролли кучлари Марказий қўмондонлиги раҳбари генерал Кеннет Маккензига таяниб ёзмоқда.
«Бугунги кетишимиз ҳам эвакуациянинг ҳарбий қисмини тугаганини, ҳам Афғонистонда 2001 йил 11 сентябрдан кейин кўп ўтмай бошланган қарийб 20 йиллик миссиянинг якунланганини англатади», — деди у.
Маккензи Американинг сўнгги ҳарбий-транспорт самолёти Кобул аэропортини тарк этганини маълум қилди.
Ҳарбий эвакуация якунланди, аммо АҚШ фуқароларига ҳамда АҚШга кетиш ҳуқуқига эга бўлган ва буни истайдиган афғонларга ёрдам бериш дипломатик миссияси давом этмоқда.
АҚШ Давлат департаменти маълумотларига кўра, айни пайтда Афғонистонда 250 кишидан камроқ АҚШ фуқаролари қолмоқда.
АҚШнинг Афғонистондаги ҳарбий миссияси қарийб 19 йил-у 11 ой давом этди. Америка қўшинлари мамлакатга 2001 йил 11 сентябрда Нью-Йорк ва Вашингтонда терактлар уюштирган «Ал-Қоида» билан курашиш учун келган эди.
Бу АҚШ тарихидаги энг узоқ давом этган уруш бўлди. Унда 2400 дан ортиқ Америка ҳарбий хизматчилари ҳалок бўлди, яна 20 мингдан ортиғи яраланди. Ушбу миссия АҚШга 1-2 триллион долларга тушган.
АҚШ Афғонистондан қўшинларини олиб кетиш ҳақида 2020 йилда эълон қилди. Бу жараён якунланмасдан туриб, мамлакатда ҳокимият тепасига «Толибон» ҳаракати қайтиб келди, у 1990 йилларда, америкаликлар Афғонситонга келишидан олдин мамлакатнинг катта қисмини бошқарган.
Америка ва «Толибон» ўртасидаги келишувга мувофиқ, АҚШ ўз қўшинларини Афғонистондан 2021 йил 31 августгача олиб кетиши керак эди.
Изоҳ (0)