«Ўзбекистон Афғонистондаги ‘Толибон’ режимидан қочганларга ўз чегараларини очишга тайёр»лиги ҳақидаги маълумотлар ахборот агентликлари ва веб-сайтлари орқали тарқалди. Шу муносабат билан Ўзбекистон ташқи ишлар вазирлиги баёнот берди.
Таъкидланишича, ҳозирда хавфсизликни таъминлаш мақсадида Ўзбекистон–Афғонистон чегараси тўлиқ ёпилган ва «Термиз» назорат-ўтказиш пунктидан қуруқлик орқали ўтиш амалга оширилмаяпти.
«Яқин орада Ўзбекистон–Афғонистон чегарасидаги ‘Термиз’ назорат-ўтказиш пунктини очиш кўзда тутилмаган. Чегарани кесиб ўтишга бўлган ҳар қандай уринишлар, уларнинг сабабларидан қатъи назар, Ўзбекистон Республикаси қонунчилигига мувофиқ бартараф этилади.
Ўзбекистон томони қатор давлатларга охирги 12 кун ичида Афғонистондан ўз фуқароларини эвакуация қилиш бўйича гуманитар операцияларни амалга оширишда ёрдам кўрсатиб, уларнинг мамлакатимизга келиши ва Ўзбекистонни тарк этиши фақат ҳаво йўли орқали амалга оширилди.
Ташқи ишлар вазирлиги Ўзбекистон Республикаси ўз ҳудудида афғон қочоқларини қабул қилмаслигини, транзитда ёрдам кўрсатишини, уларнинг мамлакатда қатъий чекланган вақтда бўлиб туришини яна бир бор маълум қилади
Ўзбекистон томони Афғонистон билан анъанавий дўстона ва яхши қўшничилик муносабатларини ривожлантириш ҳамда қўшни мамлакатнинг ички ишларига аралашмаслик тамойилларига қатъий содиқлигини яна бир бор таъкидлайди», – дейилади вазирлик хабарида.
Бундан аввал Германия Афғонистондан эвакуация қилинган 2 мингдан ортиқ кишини Тошкент орқали олиб чиққани, Ўзбекистон афғон қочқинларини қабул қилиб, Сурхондарёдаги чодирли шаҳарчага жойлаштиргани ҳамда афғонлар Ўзбекистон чегарасини қонуний равишда кесиб ўтишнинг айёрона йўлини топгани тўғрисида хабар берилганди
Изоҳ (0)