2020 йилда Тошкент шаҳридаги 12-туманга айланган Янгиҳаёт Ўзбекистондаги ўз логотипига эга бўлган илк туман бўлди. Бу ҳақда туман ҳокимлиги ахборот хизматига таяниб, «Халқ сўзи online» хабар берди.
Таъкидланишича, мазкур логотип муаллифлик ҳуқуқига эга ҳисобланади.
«Қисқача қилиб айтганда, янги туман янги Ўзбекистоннинг янги ҳаётини ўзида мужассам этишга, ҳар ишда креатив, биринчи ва масъулият билан ёндашишга бел боғлаган. Туман ўз имижини яратаркан, ушбу логотипни кўрганингизда янги бир ҳаёт, сифат, фаровонлик ва масъулият эсингизга тушишини мақсад қилган», — дейилади туман ҳокимлиги матбуот хизмати хабарида.
Туман логотипи ўзига хос маънога эга бўлиб, унда Янгиҳаёт сўзидаги икки калит ҳарф – «Y» ва «h» ифодаланган. Ушбу ҳарфлар мовий ва зангори рангларда бўлиб, улар янги, тоза, соф ҳаётни билдиради. Логотип шаклида ўткир ва чорак айлана кесишувларидан фойдаланилган. Бу услуб ҳам шарқона, ҳам замонавий минималистик услубни ўзида мужассамлаштиргани билан эътиборга лойиқ. Шунингдек, ҳарфлар шакли япроқларни эслатади. Япроқлар эса катта бир дарахт бўлиб, туман Ўзбекистоннинг бир бўлаги эканини англатади.
Эслатиб ўтамиз, Янгиҳаёт тумани Олий Мажлис Қонунчилик палатаси ва Сенатининг 2020 йил сентябрдаги тегишли қарорлари асосида ташкил этилган. Маълумот учун, Янгиҳаёт тумани майдони пойтахт ва Тошкент вилоятидаги 6 туман ҳудуди ҳисобига кенгайтирилган.
Изоҳ (0)