30 август куни Тошкент вилоятининг Қуйи Чирчиқ туманида 2021/2022-ўқув йили олдидан яна бир таълим муассасасининг очилиш маросими бўлиб ўтди. Бу ҳомийлик маблағи ҳисобидан қурилган Республикадаги илк STEM фанларига ихтисослашган мактаб ҳисобланади, деб хабар беради Халқ таълими вазирлиги матбуот хизмати.
Очилиш маросимидан олдин мактабни тўлиқ қуриб ва жиҳозлаб берган ҳомий тадбиркор Ғофур Раҳимов ҳамда халқ таълими вазири Шерзод Шерматов томонидан рамзий маънода кўчатлар экилган.
Маълум қилинишича, Тошкент вилоятида сўнгги 3 йил давомида 268 та мактаб инвестиция ва бошқа дастурлар асосида таъмирланиб, бунинг учун 380 миллиард сўм маблағ сарфланган. 2021 йилнинг ўзида қарийб 500 та (55 фоиз) мактабда таъмирлаш ишлари, жумладан, 40 та мактабда инвестиция, 41 та мактабда «Обод қишлоқ» дастури асосида, 418 та мактабда янги ўқув йилига тайёрлаш борасида жорий таъмирлаш ишлари амалга оширилган.
«Қувонарли жиҳати, вилоятда мактабларнинг шаклини ўзгартириш учун саховатли тадбиркорлар ҳам ўз ҳиссасини қўшмоқда. Бугун мана шундай тадбиркорлардан бири Ғофур Раҳимов маблағлари эвазига 45-мактабнинг эски биноси ўрнида замонавий таълим маскани қад ростлади. Мактабда ўқувчиларнинг замонавий таълим олиши учун барча имкониятлар мавжуд. 600 ўринга мўлжаллаб қурилган таълим муассасасида 634 нафар ўқувчига 43 нафар педагог таълим беради. Мактаб энг замонавий жиҳозлар ва сўнгги ахборот технологиялари билан жиҳозланган. STEM фанларига ихтисослашган таянч мактабида математика, чет тили, ахборот технология, кимё, биология фанлари чуқурлаштирган ҳолда ўқитилади», — дейилади хабарда.
Аввалроқ ОТБ Ўзбекистонда STEM таълимини ривожлантиришга 100 миллион доллар ажратиши тўғрисида хабар берилганди.
Эслатиб ўтамиз, AIBA собиқ президенти Ғофур Раҳимов 2019 йилнинг июлида ташкилот раҳбарлиги лавозимини бутунлай тарк этганди. Ўша йилнинг сентябрида эса у АҚШ Молия вазирлиги Хорижий активларни назорат қилиш бошқармаси устидан судга арз қилган эди.
Изоҳ (0)