Айни пайтда Кўксаройда бўлиб ўтаётган бир гуруҳ турли соҳа вакилларини тақдирлаш маросимида Президент Шавкат Мирзиёев таълим соҳаси ҳақида сўз юритди. Бу ҳақда «Дарё» мухбири Миролим Исожонов хабар бермоқда.
«Кўпчилик яхши билади, олдинлари ҳар кузда ўқитувчи ва шифокорларнинг уч ой умри далада пахта териб ўтарди. Мактабда 10 йил эмас, 7,5 йил ўқиларди. Биргина қарор билан 7 миллион нафар теримчини далалардан чиқариб олдик. Ҳозир ҳамма ўз иши билан шуғулланяпти, пахтани эса керак одам териб олади.
Мамлакатимиз келажагини таълимда кўраман. Билими бор одам ҳар қандай шароитда йўлини топа олади. Агар биз сифатли таълим бера олсак, фарзандларимизнинг келажагидан хавотир олмасак ҳам бўлади.
Беш йил олдин олий таълим билан қамровимиз 9 фоиз эди, бугунги кунда 29 фоизни ташкил қиляпти. Аммо бу кўрсаткичдан ҳали хурсанд эмасман. 50 фоизгача чиқарганимиздан кейин кўнглим тўлади. Таълим сифатини оширишга бекорга катта аҳамият бермаяпмиз. Мактабгача таълим вазирлиги фаолиятини йўлга қўйганимиз бежиз эмас. Халқ таълими соҳасида ҳам изчил ислоҳотлар қиляпмиз. Барчаси вақти келиб, албатта, ўз мевасини беришига ишонаман.
Икки йил аввал Марҳаматда IT-Park очганимизда кўпчилик бу соҳанинг ривожланишига ишонмаганди. Ҳозир ўша паркдаги йигит-қизлар ойига 3-4 минг долларгача пул топишяпти. Бундан кейин ҳам ИТ соҳасига эътиборимизни кучайтирамиз», — деди Шавкат Мирзиёев.
Эслатиб ўтамиз, шу йилнинг июлида Шавкат Мирзиёев олий таълим муассасаларида таълим олиш имкониятларини кенгайтиришга оид қарорни имзолаган. Шунингдек, Ўзбекистонда «темир дафтар»даги оилаларнинг ҳар бир фарзандига ўқув қуроллари ва мактаб формаси сотиб олиш учун 500 минг сўмдан берилиши, Ўзбекистонда ОТМга киришда энг юқори балл тўплаган 200 нафар абитуриент учун Президент гранти жорий этилгани ҳамда Ўзбекистонда икки ва ундан ортиқ фарзанди тўлов-шартнома асосида ўқиётган оилаларга имтиёзли таълим кредити берилиши ҳақида хабар берилганди.
Изоҳ (0)