Жиззах вилоятининг Янгиобод туманидаги 2-сон давлат мактабгача таълим ташкилотида 30 июнь куни 6 ёшли қиз вафот этди. Бу ҳақдаги хабар дастлаб ижтимоий тармоқларда тарқалди.
19 август куни вилоят мактабгача таълим бошқармаси матбуот хизмати тарқалган хабарга расмий муносабат билдирди. Унга кўра, 2015 йилда туғилган тарбияланувчи Р.Д. 30 июнь куни боғчага яхши ҳолатда келган. Шифокор уни тиббий текширувдан ўтказганидан сўнг тарбиячи ва ёрдамчи тарбиячи қабул қилиб олган.
Тушликдан сўнг тарбиячилар томонидан болаларга соғломлаштирувчи бадантарбия машғулотлари ўтилиб, болалар уйқуга ётқизилган. Шу куни 14:30 лар атрофида ёрдамчи тарбиячи болаларни уйқудан уйғотаётганда 6 ёшли Р.Д.нинг безовталанаётгани, яъни бурни қонаётгани маълум бўлган. Тарбиячи шу заҳотиёқ тез тиббий ёрдамга мурожаат қилган ва бу ҳақда туман мактабгача таълим бўлимига хабар берилган.
«Дарё» сўровига асосан Бош прокуратура матбуот хизматининг маълум қилишича, қизча зудлик билан туман тиббиёт бирлашмасига келтирилган, бироқ бирлашма шифокорлари томонидан унинг вафот этгани аниқланган.
Ҳолат юзасидан туман прокуратураси томонидан терговга қадар текширув ҳаракатлари олиб борилган бўлиб, текширув ҳаракатлари давомида воқеа содир бўлган куни туман прокуратураси ходимлари ва бошқа тезкор тергов гуруҳи вакиллари воқеа жойига чиқиб, ҳодиса жойи кўздан кечирилган. Р.Д.нинг ўлими сабабларини аниқлаш мақсадида судга оид тиббий экспертиза тайинланган ва тегишли фуқаролардан тушунтириш хатлари олинган.
Суд тиббий экспертизасининг 27 июлдаги хулосасига кўра Р.Д.нинг ўлимига юқори нафас йўлларини қусуқ массаси билан беркилиши оқибатидаги механик асфиксиядан юзага келганлиги, мурда танасида бирор-бир тан жароҳатлари аниқланмаганлиги кўрсатилган.
Терговга қадар текширув ҳаракатлари давомида тўпланган бир қатор маълумотлар, ҳолат юзасидан сўралган фуқароларнинг тушунтириш хатлари, иш ҳолатлари бўйича тўпланган бошқа далилларга кўра, 6 ёшли Р.Д.нинг вафот этганлиги ҳолатида бирор-бир шахснинг ҳаракатларида жиноят таркиби аниқланмаганлиги сабабли 30 июль куни жиноят иши қўзғатишни рад қилиш тўғрисида қарор қабул қилинган.
Изоҳ (0)