Ўзбекистонда маҳкумлар ва тергов ҳибсхоналарида сақланаётган шахсларнинг қариндошлари билан қисқа муддатли учрашувларига эпидемик вазият сабаб қўйилган чекловлар бекор қилинди. Бу ҳақда Соғлиқни сақлаш вазирлиги хабар берди.
Коронавирус инфекциясининг янада кенг тарқалишининг олдини олиш мақсадида Республика махсус комиссиясининг 2021 йил июль ойидаги қарори билан жазони ижро этиш колонияларида жазо муддатини ўтаётган маҳкумлар ҳамда тергов ҳибсхоналарида сақланаётган шахсларга қариндошлари билан узоқ муддатли учрашув берилиши вақтинча тўхтатилган эди.
Кейинчалик мамлакатдаги эпидемик вазиятни ҳисобга олиб, улар ўртасида коронавирус тарқалиб кетишининг олдини олиш мақсадида қисқа муддатли учрашув берилишини вақтинча тўхтатиш тўғрисидаги таклифлар ҳам маъқулланганди.
Сўнгги кунларда мамлакатдаги эпидемик ҳолат барқарорлашаётганини инобатга олиб, Республика махсус комиссияси томонидан жазони ижро этиш колонияларида жазо муддатини ўтаётган маҳкумлар ҳамда тергов ҳибсхоналарида сақланаётган шахслар билан қисқа муддатли учрашувга қўйилган вақтинчалик тақиқлар бекор қилинди.
Маълумот учун, 2021 йил январь ҳолатига кўра, Ўзбекистонда 22 мингдан ортиқ киши жазони ижро этиш муассасаларида жазо муддатини ўтамоқда.
Аввалроқ Республика махсус комиссияси Ўзбекистонда Мустақиллик кунига бағишланган байрам тадбирларини ўтказишни маъқуллагани тўғрисида хабар берилганди.
Изоҳ (0)