Шацких, Гейнрих, Шомуродов ва бошқалар. Ўзбекистон терма жамоаси тарихидаги энг яхши тўпурарлар

Ўзбекистон терма жамоасида ҳар доим ҳимоя борасида муаммолар бўлгани ҳеч кимга сир эмас. «Оқ бўрилар» (Ўзбекистон терма жамоасининг лақаби шунақа) аксарият ҳолларда айнан ҳимоя чизиғидаги камчиликлар туфайли ўз мақсадига эришолмай қолади. Аммо олдинги чизиқ вакиллари ҳақида бундай дейиш бироз мушкул. Боиси жамоада барча даврларда ҳеч бўлмаганда битта юқори даражали ҳужумчи бўлган ва улар озми, кўпми ишончни оқлаган. «Дарё» қуйида Ўзбекистон терма жамоаси тарихидаги энг яхши тўпурарлар ҳақида ҳикоя қилади.

Улуғбек Бақоев

Фаолиятининг катта қисмини чет элда, асосан, Қозоғистон чемпионатида ўтказган Улуғбек Бақоев терма жамоада 52 ўйин ўтказиб, 14 та гол уради. Унинг эсда қоларли голлари сифатида 2011 йилги Осиё чемпионатида Иорданияга қарши ўйиндаги дубли ва 2014 йилги Жаҳон Чемпионати саралаши доирасида Эрон дарвозасига киритган ғалаба тўпини эслаш мумкин.

Жафар Ирисметов

Ирисметов ҳам Бақоев сингари узоқ вақт давомида Қозоғистон ва Россия клублари шарафини ҳимоя қилган. Жафар майдонда тезлиги, кучли зарбаси ва курашдан қочмаслиги билан ажралиб турарди. У терма жамоа либосида 36 ўйинда майдонга тушиб, 15 марта рақиб дарвозабонларини ранжитган.

Игорь Сергеев

Ўзбекистон ёшлар терма жамоаси ва «Пахтакор»даги ўйинлари орқали миллий жамоага жалб этилган Игорь Сергеев вақтида жуда кўп танқид қилинганига қарамай, терма сафида яхши ҳаракат қилган деб айтиш мумкин. Буни унинг статистикаси ҳам исботлаши мумкин — 53 ўйин, 17 та гол. Игорь ушбу рўйхатда фаолиятини давом эттираётган кам сонли футболчилардан биридир, у ҳозирда Қозоғистоннинг «Тобол» клуби сафида ҳаракат қилмоқда ва ўзи майдонга тушган деярли ҳар учрашувда гол урмоқда.

Игорь Шквирин

Ҳозирда «Турон»ни Суперлигада олиб қолиш учун курашаётган Шквирин ўз вақтида Ўзбекистон терма жамоасининг асосий ҳужумчиси бўлган, 1994 йилги Осиё ўйинларда ғалаба қозонган жамоанинг етакчиларидан бири эди. Шквирин фаолиятининг катта қисмини «Пахтакор»да ўтказган, шунингдек, у Исроил, Малайзия ва Ҳиндистон чемпионатларида ҳам тўп суришга муваффақ бўлган. Унинг терма жамоадаги статистикаси қуйидагича: 31 ўйин, 20 та гол.

Одил Аҳмедов

2007 йилдан 2021 йилгача, 14 йил давомида терма жамоада ҳаракат қилган Одил Аҳмедов жамоанинг ҳақиқий жонкуяр ўйинчиларидан бўлган. Одил курашлардан қочмаслиги ва уларда ўзини аямаслиги билан таҳсинга лойиқ эди. 2011 йилдан бери легионер сифатида ҳаракат қиладиган Аҳмедов терма жамоада 105 ўйинда майдонга тушиб, 20 та голни ўз номига ёздириб қўйган. Ҳозирда у Хитойнинг «Санчжоу Майти Лаёнс» клубида фаолиятини давом эттирмоқда.

Элдор Шомуродов

Шомуродов миллий жамоадаги дебютини 2015 йилда Самвел Бабаян қўл остида ўтказган. Ўтган вақт оралиғида Элдор терма жамоа либосида 44 ўйин ўтказиб, 21 та гол урган. Унинг терма жамоадаги энг ёрқин ўйинлари 2019 йилги Осиё чемпионатига тўғри келади. Ўша мусобақада Элдор Эктор Купер томонидан марказий ҳужумчи сифатида кашф этилади ва умумий ҳисобда 4 та гол уради. «Рома» футболчиси ҳозирда терма жамоанинг асосий футболчиси ҳисобланади. ЎФА билан шартнома имзолаши кутилаётган Сречко Катанец ҳам ўйинни Элдорнинг атрофида қурса ажаб эмас.

2002 йилда терма жамоада дебют қилган Сервер Жепаров узоқ йиллар давомида жамоанинг энг муҳим ўйинчиларидан бири бўлган. Икки бор Осиёнинг энг яхши футболчиси (2008 ва 2011 йилларда) деб топилган Жепаров майдон марказида ўйиннинг боришини назорат қиларди ва ақлли паслари билан ҳужумчиларни қулай вазиятларга олиб чиқарди. Бугунги кунда Ўзбекистон U-14 терма жамоасига мураббийлик қилаётган Жепаров 126 та баҳсда майдонга тушиб, 25 бор рақиблар дарвозасини ишғол қилган. Қайд этиш жоиз, Жепаров 126 та ўйини билан терма жамоа сафида энг кўп ўйин ўтказган футболчи ҳисобланади.

Миржалол Қосимов

Миржалол Қосимов 1992—2005 йилларда Ўзбекистон терма жамоасида ҳаракат қилган. 1994 йилги Осиё ўйинларидаги ғалабанинг қўлга киритилишида ҳам Қосимовнинг хизматлари беқиёс бўлган. Қосимов гол уришдан ҳам кўра кўпроқ заргарона узатмаларни беришни афзал биларди. Шунга қарамай, «Ўзбек Марадонаси» 66 ўйинда 31 та гол уришга муваффақ бўлган.

Александр Гейнрих

Тан олиш керак, Ўзбекистон терма жамоаси тарихида креатив ўйинчилар кўп бўлмаган, бироқ мабодо шундай ўйинчилар ҳақида гап кетса, аксарият мухлислар биринчи бўлиб Гейнрихни эслайди. «Сеҳрли таёқча» деб ном берилган Александр 2002 йилда Ўзбекистон термасидаги илк ўйинини ўтказади ва 2017 йилгача 98 ўйин ўтказиб, 32 марта рақиб дарвозабонларини «хафа» қилади.

Максим Шацких

Фаолиятининг деярли бутун қисмини Россия ва Украинада ўтказган Шацких 1999 йилда, 20 ёшида терма жамоага чақирилади. У Ўзбекистон миллий жамоаси тарихидаги энг яхши тўпурар ҳисобланади. Шацких умумий ҳисобда 61 ўйин ўтказиб, 34 та гол урган. Унинг майдондаги устун томонлари сифатида гол сезиш қобилияти ва иккинчи қаватда яхши ўйнай олишини кўрсатиш мумкин эди.