Ўзбекистон
Япониянинг Токио шаҳрида 25 август куни XVI Паралимпия ўйинлари старт олди. Дастлабки кунда эркаклар ўртасида 100 метрга баттерфляй усулида сузиш (S12 класс) мусобақасида Ислом Асланов бронза медалини қўлга киритди.
Худди шу йўналишда қатнашган Музаффар Турсунхўжаев маррага бешинчи бўлиб етиб келди. Аёллар ўртасида 100 метрга баттерфляй усулида сузиш (S13 класс) баҳслари финалида эса Шоҳсанамхон Тошпўлатова тўртинчи ўринни эгаллади.
Мазкур йўналишда қатнашган Нигорахон Мирзоҳидова ва Муслима Одилова эса саралашдан ўта олмади.
«Рома» ҳужумчиси Элдор Шомуродов иштирокида матбуот анжумани ўтказилди. Шомуродов унда янги жамоасидаги мақсадлари, Жозе Моуриньо билан қандай танишгани ва яна бир қатор мавзуларда ўз фикрлари билан ўртоқлашди. Ушбу ҳаволада Шомуродовнинг тўлиқ интервьюси билан танишишингиз мумкин.
«Олимпик» клуби бош мураббийи Тимур Кападзе 2021 йилги мавсумда Ўзбекистон Профессионал футбол лигаси томонидан ўтказиладиган мусобақалар регламенти»нинг 17.17-бандини бузди, деб хабар бермоқда ПФЛ расмий сайти.
Бандга кўра техник зонада шиппак, шорт ҳамда енгсиз футболкада бўлиши тақиқланади. Кападзе эса Про Лиганинг 16-туридан ўрин олган «Арал Самали» клубига қарши учрашув вақтида техник зонада шорт билан ҳаракат қилган. Шу сабабли мутахассис ва клуб расман огоҳлантирилган.
Суперлиганинг 16-туридан ўрин ўйинда можаро юзага келди. «Металлург» клуби бошлиғи «Машъал»га қарши ўйиндан кейин рақиб бош мураббийи Александр Хомяковга мушт туширди.
Ҳакам ҳуштаги янграгандан кейин муборакликлар устози Александр Хомяков кийиниш хонасига кетаётган вақтда «Металлург» клуби бошлиғи Шавкат Саидов кутилмаганда рақиб мураббийининг кўкрак қисмига мушт туширди.
«Машъал» клуби устози эса ўйиндан кейинги матбуот анжуманида қатнашмади. Муборак клуби буни «Металлурғ футбол клуби хавфсизликни таъминламаганлиги» билан изоҳлади. Ушбу ҳаракат туфайли бекободликлар раҳбари жиддий жазога тортилиши мумкин.
Жаҳон
Ҳарри Кейн ушбу мавсумда ҳам «Тоттенҳэм»да қоладиган бўлди. Бу ҳақда унинг ўзи ижтимоий тармоқлардаги саҳифаси орқали маълум қилди. Қайд этиш ўринли, бутун ёз давомида ҳужумчининг «Манчестер Сити»га ўтиши мумкинлиги ва «шаҳарликлар» унга 150 миллион евро беришга тайёрлиги ҳақида хабарлар тинмаганди.
«ПСЖ» Килиан Мбаппени сотишга қарор қилди, деб ёзмоқда GFFN нашри. Нашрга кўра, клуб 22 ёшли ҳужумчини 200 миллион евродан камига сотмайди. 24 август куни «Реал» Мбаппе трансфери бўйича «ПСЖ»га биринчи расмий таклифни юбориб, 160 миллион евро беришга тайёрлигини маълум қилганди. Бироқ парижликлар Килианни бу нархга сотишдан бош тортган.
«ПСЖ» директори Мбаппенинг жамоадан кетмоқчилигини ва клуб уни мажбуран жамоада олиб қолишга уринмаслигини айтди. Унинг сўзларига кўра, «ПСЖ» Мбаппени сотиб олинганидан (180 миллион евро) арзонга сотмайди.
Португалия УЕФА коэффициентлар жадвалида Францияни ортда қолдирди. Бунга «Бенфика»нинг Чемпионлар Лигаси саралаш босқичида икки ўйин натижасига кўра ПСВни мағлуб этиб, гуруҳ босқичига йўл олгани сабаб бўлди. Ушбу ғалаба учун Португалияга бонус баллари тақдим этилди.
Португалия ҳозирда УЕФА коэффициентлари жадвалида 44.216 очко билан 5-ўринда бормоқда. Франция эса 43,498 очко билан 6-поғонага тушиб кетди.
Шунга қарамай иккала мамлакат ҳам еврокубокларда олтитадан вакилини сақлаб қолган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)