Дунё ва ўзбек спортига оид 26 август кунининг муҳим хабарлари дайжести билан танишинг.
Ўзбекистон
Токиода Паралимпия ўйинлари ўтказилмоқда. Мусобақанинг иккинчи куни Ўзбекистон учун медалсиз якунланди. 26 август куни 4 нафар пара-сузувчилар (С13 класс 100 метрга чалқанча усулда сузиш бўйича баҳсларга киришди.Музаффар Турсунхўжаев ва Ислом Асланов саралаш босқичида ўз иштирокини якунлаган бўлса, Шоҳсанамхон Тошпўлатова ва Нигорахон Мирзоҳидова финал баҳсларига йўл олишнинг уддасидан чиқди. Бироқ улар совриндорлар қаторидан жой эгаллай олмади. Тошпўлатова 1:08.37 сония натижа билан бешинчи натижани қайд этди, Мирзоҳидова эса 1:09.85 сония билан еттинчи бўлиб маррага етиб келди.
Жаҳон
Криштиану Роналду «Манчестер Сити»га ўтиши мумкин, деб ёзди Никола Скира. Унинг сўзларига кўра, «шаҳарликлар» Роналдуга 2023 йилгача мўлжалланган шартнома таклиф қилган. Футболчига ҳам бу таклиф маъқул келган ва Турин клубидан кетишга қарши эмас. Агар португалиялик инглиз клуби сафига ўтса, унинг йиллик маоши 15 миллион евро бўлиши айтилмоқда.
26 август куни Роналдунинг агенти Жорже Мендеш Турин клуби раҳбарияти билан учрашгани ва мижозининг келажагини муҳокама қилгани ҳақида хабарлар тарқалди.
«Барселона» ярим ҳимоячиси Серхио Бускетс клуб илтимосига жавобан маошининг камайишига рози бўлди, дея хабар бермоқда ESPN.
Қайд этиш ўринли, бунгача жамоанинг бошқа етакчи футболчилари Хорди Альба ва Херард Пике ҳам клубга инқироз пайтида ёрдам бериш учун маошининг камайишига рози бўлганди.
«Реал Мадрид» ҳужумчи Килиан Мбаппе учун «ПСЖ»га иккинчи трансфер таклифини юборди. Бу ҳақда Sky Sports хабар бермоқда.
Мадридликлар биринчи марта футболчини 160 миллион еврога сотиб олмоқчи бўлганди, бироқ рад жавобини олган. Энди эса испан клуби 170 миллион евро таклиф қилган.
Аввалроқ «ПСЖ» Мбаппени 220 миллион еврога сотишга тайёрлиги айтилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)