«Толибон» ҳаракатнинг нуфузли аъзоларини вазирлик лавозимларига тайинлади. Бу ҳақда ҳаракат вакилларига таяниб Reuters хабар берди.
Агентликнинг «Толибон»даги икки манбаси хабар беришича, ҳаракат ўз фахрийларини мудофаа вазири, молия ва ички ишлар вазири лавозимларига тайинлаган, чунки уларнинг фикрича, жангарилар диққатини ҳарбий фатҳга эмас, инқироз даврида мамлакатни қандай бошқаришга қаратмоқда.
«Толибон» бу тайинловларни расман эълон қилмаган, бироқ Афғонистоннинг Pajhwok агентлиги хабар беришича, Гул Оға молия вазири, Садр Иброҳим эса ички ишлар вазири вазифасини бажарувчи этиб тайинланган.
Al Jazeera телеканали «Толибон»даги манбасига таяниб ёзишича, Гуантанамо қамоқхонасининг собиқ маҳбуси Мулла Абдуқаюм Зокир мудофаа вазири вазифасини бажарувчи этиб тайинланган.
«Толибон»нинг Кобулдаги вакили асосий вазирлар тайинланганини тасдиқлади, шунингдек, унинг айтишича, «Толибон»нинг энг тажрибали командирлари орасидан вилоят губернаторлари танлаб олинади.
«Толибон» командирларидан бири ҳам асосий вазирлик лавозимларига номзодлар танлангани ҳақидаги хабарларни тасдиқлади, лекин улар ҳали расман маъқулланмаганини айтди.
«Кеча кечқурун президент саройида учрашувлар бўлиб ўтди, биз ушбу масалаларни муҳокама қилдик, аммо тайинловлар маъқуллангани эълон қилингани ҳам йўқ», — деди у исмини ошкор қилмаслик шарти билан.
Экспертларнинг сўзларига кўра, бошқа муҳим лавозимларга, асосан, жанубдаги Ҳелманд ва Қандаҳор вилоятларидаги «Толибон» ҳарбий раҳбарлари тайинланган.
Reuters хабарига кўра, Гул Оға афтидан «Толибон»нинг молиявий комиссияси раҳбари бўлган. У БМТ қўмитасининг санкциялар рўйхатига киритилганди. Шунингдек, БМТ ва Интерполнинг санкциялар ҳақидаги хабарномасида у «Толибон»нинг асосчиси, марҳум Муҳаммад Умарнинг болаликдаги дўсти бўлгани айтилади. Бир вақтлар унинг розилигисиз ҳеч кимга мулла Умар билан учрашишга рухсат берилмаган. У «Толибон» режими даврида Умар билан президент саройида яшаган.
Абдуқаюм Зокир — «Толибон»нинг жанговор ҳаракатлари қатнашчиси, командир, шунингдек, Умарнинг яқин шериги бўлган.
ОАВ маълумотларига кўра, 2001 йилда АҚШ армияси ходимлари Зокирни ҳибсга олиб, Баграм ҳарбий базасидаги қамоқхонага жўнатган, кейин у Гуантанамо қамоқхонасига кўчирилган. 2007 йилда уни қўйиб юборишди ва Афғонистон ҳукуматига топширишди, жангари эса «Толибон» тарафида курашни давом эттирди. Тахминларга кўра, шу йилнинг август ойида «Толибон» қўшинлари Кобулга кириб, президент саройини эгаллаган пайтда уларни айнан Зокир бошқарган.
Ички ишлар вазири этиб тайинланган Садр Иброҳим ҳам «Толибон»нинг асосий аъзоси. Агентликнинг таъкидлашича, «Толибон» ўз вакилларини тайинлашда Молия вазирлиги ва Марказий банкдаги ўрта даражали амалдорларга ўз вазифаларига қайтишни буюрган.
Аввалроқ «Толибон» раҳбарлари Афғонистонни бошқариш учун 12 кишидан иборат кенгаш тузмоқчи экани хабар қилинганди.
«Толибон» Афғонистонда президент ёки бошқа ягона раҳбар лавозимини қайта тиклашни истамайди, лекин шу билан бирга, улар аввалги ҳукумат аъзоларига янги кенгашдан ўрин таклиф қилишни режалаштирмоқда. Шу тарзда «Толибон» халқаро ҳамжамият эътирофига сазовор бўлиш имкониятини ошириш учун иложи борича инклюзив кўринадиган бошқарув органини яратмоқчи, деб ёзади Foreign Policy.
Изоҳ (0)