Ўзбекистонда дарахтларни кесишга мораторий жорий этилганига қарамай, Тошкент вилояти Қуйи Чирчиқ туманида дарахтлар ноқонуний кесилгани аниқланди.
Тошкент вилояти экология ва атроф-муҳитни муҳофаза қилиш бошқармасининг хабар беришича, 23 август куни бошқарма ходимлари томонидан олиб борилган ўрганишлар давомида Қуйи Чирчиқ тумани «Ватан» МФЙ ҳудудида жами 2 туп манзарали чинор дарахти номаълум шахслар томонидан қонунга зид равишда ўзбошимчалик билан кесилгани аниқланган.
Оқибатда ўсимлик дунёсига 111 миллион 205 минг 500 сўм миқдорида зарар етказилган.
Қайд этилишича, қонунбузар фуқаролар шахсини аниқлашда, ҳуқуқбузарлик содир этишда фойдаланган транспортларни жарима майдончасига киритишда ҳамда ўсимлик дунёсига етказилган зарарни давлат фойдасига ундиришда амалий ёрдам сўраб, ички ишлар органларига мурожаат қилинди.
Маълумот учун, Ўзбекистонда 2021 йилнинг ўтган 6 ойида мораторий даврида 316 минг дона қимматбаҳо дарахт асраб қолинган. Шавкат Мирзиёев Ўзбекистонда дарахтларни кесишга мораторий 2024 йилга қадар узайтирилиши ва жавобгарлик кескин кучайтирилишини айтди. Бундан ташқари, давлат раҳбари Тошкент шаҳри ва вилоят марказларида экология полицияси ташкил этилишини ҳам маълум қилди.
Изоҳ (0)