Айни вақтда бўлиб ўтаётган Олий Мажлис Сенатининг 18-ялпи мажлисида Ташқи ишлар вазирлигининг 2021 йил биринчи ярим йиллик фаолияти тўғрисидаги ахбороти эшитилди, деб хабар беради «Gazeta.uz».
Ҳисоботдан сўнг Сенатнинг Мудофаа ва хавфсизлик масалалари қўмитаси раиси Қутбиддин Бурҳонов ташқи ишлар вазирининг биринчи ўринбосари Фарҳод Арзиевга Афғонистон масаласидаги савол билан юзланган.
«Бугунги кунда жуда кўп давлатлар томонидан экстремистик-террористик ҳаракат деб тан олинган ‘Толибон’нинг бизга қўшни бўлган Афғонистонда раҳбарликка келгани муносабати билан сиз Ўзбекистон ташқи сиёсатини қандай кўрасиз?», — дея сўраган сенатор.
«Сиз кўтарган масалангиз нафақат минтақамиз, балки халқаро хавфсизлик тартибидаги долзарб мавзу. Ҳаммамиз яхши биламиз, Афғонистонда ҳозир янги воқелик, янги вазият юзага келган. Ҳозир Афғонистонда олдиндан прогноз қилиб бўлмайдиган жараённи кузатяпмиз. Лекин битта нарсани билишимиз керак, ҳурматли Президентимиз белгилаб берган ташқи сиёсат тамойиллари асосида, бевосита Афғонистон билан муносабатларимиз йўналишларида белгилаб берган фундаментал ёндашувлар, асосий вазифалар доирасида бугун эмас, анчадан бери Ўзбекистон Афғонистондаги тинчлик жараёнларига бевосита ҳисса қўшиб келяпти», — дейди Фарҳод Арзиев.
У Президент ташаббуси билан 2018 йилда Тошкентда Афғонистон бўйича махсус халқаро конференция ўтказилгани, 2021 йилда Марказий Осиё ва Жанубий Осиё халқаро конференциясида ҳам Афғонистон можароси муҳим мавзулардан бири бўлганини тилга олган.
«Энг аввало, биз Афғонистонда барча сиёсий кучларнинг манфаатини эътиборга оладиган, уларнинг ўзаро тинчлик музокаралари натижасида эришиладиган ҳукумат шаклланиши тарафдоримиз. Биз Афғонистонда қуролли куч ишлатиш йўли билан афғон муаммоси ҳал бўлади деган ёндашувдан доим йироқ бўлганмиз», — дейди ташқи ишлар вазири ўринбосари.
«‘Толибон’ ҳаракати билан бир неча йиллардан бери мулоқот қилиб келяпмиз. Ва, албатта, ‘Толибон’га ҳам Афғонистон жамиятининг инкор этиб бўлмайдиган фактори сифатида ёндашамиз. Кейинги ёндашувларимизда ҳам айнан мана шу принциплар биз учун асосий йўналиш бўлиб қолади. Афғонистон ён қўшнимиз, жон қўшнимиз, қолаверса, бу давлатга Марказий Осиёнинг ҳам ажралмас қисми сифатида қараймиз», — дейди ТИВ вакили.
Арзиев сўзи якунида Афғонистонда барқарор тинчлик ўрнатиш, уни халқаро ривожланиши учун зарур омилларни яратишга қаратилган ҳамма саъй-ҳаракатларда Ўзбекистон фаол иштирок этишини қўшимча қилган.
Мавзуга доир:
- Абдулазиз Комилов Саудия Арабистони ташқи ишлар давлат вазири билан Афғонистондаги воқеаларни муҳокама қилди
- Афғонистонда этник ўзбеклар ва тожиклар «Толибон»га қарши коалиция тузмоқда (видео)
- Афғонистоннинг 150 нафар фуқароси орқага қайтарилган, «Толибон» уларнинг хавфсизлигини кафолатлаган — Ўзбекистон ТИВ
Изоҳ (0)