Apple компанияси кузда ўзининг қатор янги гаджетларини тақдим этишга тайёргарлик кўрмоқда. Улар орасида «ақлли» Apple Watch соатларининг янги авлод ҳам бор, деб хабар беради IXBT.
Хитойдаги манбаларнинг маълум қилишича, Apple Watch Series 7 каттароқ ўлчамга эга бўлади — 41 ва 45 миллиметр (ҳозирда Apple Watch Series 4’нинг 40 ва 44 миллиметрли вариантлари мавжуд).
Компания Apple Watch Series 4 тақдим этилгунига қадар ўлчами 38 ва 42 миллиметр бўлган соатларни ишлаб чиқариб келган. 2018 йилда каттароқ дисплейли Series 4 чиқиши билан корпус ўлчами мос равишда 40 ва 44 миллиметрга қадар ошган.
Маълумотларга кўра, янги Apple Watch Series 7 ўтган авлоддаги тасмалар ҳам мос келади. Фойдаланувчилар 40 ва 44 миллиметрли моделлар учун мўлжалланган тасмаларини ишлатиши мумкин. Келажакда Apple Watch «ақлли» соатлари дизайнини буткул ўзгартириш ниятида — соатлар iPhone 12 услубидаги бурчаксимон ташқи кўриниш, ингичка ҳошия ва кенгайтирилган экран майдонига эга бўлади.
Apple Watch Series 7 нинг расмий дебюти сентябрь ойида iPhone 13 нинг расмий тақдимоти билан бир вақтда бўлиб ўтади. Шунингдек, яқин ойларда янги iPad, AirPods, Маc мини ва MacBook Prо ҳам тақдим этилиши кутилмоқда.
Аввалроқ Apple Watch 2022 йилдан бошлаб босим, қондаги қанд ва алкоголь миқдорини ўлчашни ўрганиб олиши тўғрисида хабар берилганди.
Изоҳ (0)