Марказий ҳарбий округнинг «Фориш» тоғ полигонида «АрМИ—2021» VII Халқаро армия ўйинларининг Ўзбекистон мезбонлик қилаётган «Ҳарбий-тиббий эстафета» ва «Дала ошхонаси» мусобақасига 22 август куни старт берилди. Бу ҳақда «Дарё» мухбири хабар берди.
Вазирлик томонидан респулика ОАВ вакиллари учун «Фориш» полигонида яратилган шароитлар билан таништириш мақсадида пресс-тур ўтказилди. Унинг доирасида Халқаро армия ўйинлари ҳакамлари томонидан матбуот анжумани ҳам ташкил этилди. Анжуман доирасида журналистлар ўзларини қизиқтирган саволларга жавоб олди.
Шундан сўнг ОАВ вакиллари полигонда мусобақа иштирокчилари учун яратилган шароитлар билан танишди. Шунингдек, «Дала ошхонаси» мусобақаси ўтказиладиган ҳудудда бўлиб, турли давлатлардан келган ҳарбий ошпазларнинг маҳоратларини кузатди.
Кечки соат 19:00 да полигон саф майдонида «АрМИ—2021» Ҳарбий-тиббий эстафета» ҳамда «Дала ошхонаси» мусобақаларининг тантанали очилиш маросими бўлиб ўтди.
Унда Ўзбекистон мудофаа вазири, генерал-лейтенант Баҳодир Қурбонов, Россия мудофаа вазири ўринбосари Тимур Иванов, Жиззах вилояти ҳокими Эргаш Солиев, иштирокчи давлатлар жамоалари вакиллари, сенаторлар, давлат ва жамоат ташкилотлари вакиллари, Мудофаа вазирлиги ҳузуридаги Жамоатчилик кенгаши аъзолари, фахрийлар ва ёшлар, журналистлар ва блогерлар иштирок этди.
2021 йилги «Ҳарбий-тиббий эстафета» мусобақасида жами 8 давлат — Ўзбекистон, Хитой, Россия, Беларусь, Вьетнам, Мьянма, Фаластин, Тожикистон иштирок этаётган бўлса, «Дала ошхонаси» мусобақасида эса 5 давлат — Ўзбекистон, Вьетнам, Россия, Беларусь ҳамда Тожикистон жамоалари ўзаро беллашмоқда.
Халқаро мусобақаларни кириш сўзи билан очиб берган Ўзбекистон мудофаа вазири иштирокчиларни қутлаб, уларга омадлар тилади. Шундан сўнг табрик учун сўз Россия мудофаа вазири ўринбосари Тимур Ивановга берилди.
Мудофаа вазирлиги Марказий ҳарбий оркестрининг кўргазмали дефилеси, таниқли бадиий жамоалар ва санъаткорлар ижросидаги катта концерт дастури ҳамда турли халқлар маданиятини ифода этувчи бадиий чиқишлар намойиш қилинди. Қуролли Кучлар академияси курсантлари қурол билан кўргазмали чиқишларни ижро этди.
Эслатиб ўтамиз, 2020 йилда Ўзбекистон Мудофаа вазирлиги ҳарбий хизматчилари Халқаро армия ўйинлари доирасида «Фориш» тоғ полигонида ўтказилган «Ҳарбий-тиббий эстафета», Қўқонда эса «Йўл патрули» танловларида биринчи ўринни қўлга киритган эди.
Изоҳ (0)