Қибрайда 7 гектар ерни 225 минг долларга сотишга уринган туман ҳокимлигининг собиқ ходимлари ушланди

Тошкент вилоятининг Қибрай туманида ижарага берилган ерни ўзганинг номига расмийлаштириб бериш эвазига пул талаб қилган шахслар қўлга олинди, деб хабар беради ИИВ матбуот хизмати.

Маълум қилинишича, 17 август куни фуқаро Н. Якубова ИИВга ариза билан мурожаат қилиб, Қибрай туманида яшовчи Абдурашид ва Ориф исмли шахслар ҳокимият томонидан уларга 49 йилга ижарага берилган 7 гектар ерни сотиб, ҳокимликда ишловчи танишлари орқали унинг номига расмийлаштириб беришга ваъда қилганини билдирган. Бунинг эвазига улар 225 минг доллар беришини талаб қилаётганини айтган.

18 август куни ўтказилган тезкор тадбирда пойтахтнинг Юнусобод тумани 19-мавзесидаги Қариялар оромгоҳи олдида А.О. ариза муаллифи Н.Якубовадан талаб қилинган пулнинг 5 минг долларини олган вақтида ушланган.

Суриштирувда аниқланишича, А.О. бу пулларни ер эгаси Т.Р.га бериши керак бўлган. Тезкор тадбир давом эттирилиб, 19 август куни 2011—2018 йиллар Қибрай тумани ҳокимиятида масъул лавозимларда ишлаган Т.Р. ва А.М. туманнинг «Ўткир» маҳалласида А.О.дан 5 минг долларни олган вақтида далилий ашёлар билан қўлга олинган.

Ҳолат бўйича 19 август куни Жиноят кодексининг 168-моддаси (фирибгарлик) 4-қисми «а» банди ва 28, 211-моддаси (жиноят иштирокчиларининг турлари, пора бериш) 3-қисми «а» банди билан жиноят иши қўзғатилиб, тергов олиб борилмоқда.

Аввалроқ Фарғона, Наманган ва Сурхондарёда ерни ноқонуний равишда сотаётган шахслар қўлга олингани, ДХХ Бўстонлиқда от спортига ажратилган 25,4 гектар ерни 1,5 млн долларга сотмоқчи бўлган шахс ушлангани тўғрисида хабар берилганди.