Ўзбекистон Молия вазирлиги «Очиқ бюджет» порталида ташаббусли бюджет жараёнининг 3-босқич овоз бериш натижалари тўғрисида маълумот берди. «Gazeta.uz»нинг ёзишича, гап фуқароларнинг 286,56 миллиард сўм ажратиладиган ташаббусларига овоз бериш жараёни ҳақида кетмоқда.
Ташаббусли ёки партисипатор бюджетлаштириш бу — аҳолининг ташаббусларини ҳисобга олган ҳолда бюджет маблағларининг муайян бир қисмини сарфлаш бўйича уларнинг бевосита иштирокида қарорлар қабул қилиш ҳамда қабул қилинган қарорларнинг амалга оширилишини кузатиш амалиётидир.
Молия вазирлиги маълумотларига кўра, 16 август ҳолатида ҳудудлар кесимида келиб тушган таклифлар сони — 41 125 та. Ушбу босқич доирасида қабул қилинган ва овоз бериш босқичига ўтказилган таклифлар сони — 21 832 та (53 фоиз). Тегишли ҳудудлардаги ишчи комиссия томонидан рад этилган таклифлар сони эса 19 293 та, яъни 47 фоизга етди.
Шунингдек, ҳудудлар кесимида фуқаролар томонидан берилган овозлар сони — 22 954 тага етган. Шундан, овоз бериш жараёнига фуқаролар жалб этилган туман ва шаҳарлар сони — 189 тани ташкил этмоқда.
3-босқич овоз бериш жараёнида фуқаролар томонидан биронта овоз берилмаган туман ва шаҳарлар сони — 16 тани ташкил этган.
Аввалроқ ташаббусли бюджет ҳақида батафсил маълумот берилганди. Мазкур лойиҳа орқали фуқаролар инфратузилмани яхшилаш, хиёбонлар, болалар ва спорт майдончалари, ички йўлларни қуриш, мактабларни таъмирлаш ва жиҳозлаш ҳамда бошқа масалалар бўйича лойиҳаларни таклиф этиб, маҳаллий бюджетнинг тақсимланишида иштирок этишлари мумкин.
Бюджет шаклланиши жараёнида жамоатчилик иштирокини кенгайтириш мақсадида туман ва шаҳарларда тегишли бюджетларнинг тасдиқланган умумий харажатларининг 5 фоизини жамоатчилик фикри асосида шакллантирилган тадбирларни молиялаштиришга йўналтириш бўйича янги тартиб босқичма-босқич жорий этилади. Ҳозир ушбу тартиб Ўзбекистоннинг ҳар бир вилоятида битта туман ёки шаҳарда жорий қилинган (жами 14), 2022 йил 1 январдан бошлаб эса бу тартиб мамлакатнинг барча туман ва шаҳарларида жорий қилинади.
Овоз беришга қўйилган лойиҳаларга мисоллар:
- Тошкентнинг Олмазор туманидаги 18-оилавий поликлиника филиалини 200 миллион сўмга реконструкция қилиш. Ташаббус 109 овоз тўплаган;
- Тошкент вилоятининг Тошкент туманидаги 29-мактабда 120 миллион сўм эвазига ҳожатхона қуриш. Овозлар — 5 та;
- Фарғона шаҳридаги 41-сонли болалар боғчасини 800 миллион сўм эвазига капитал таъмирлаш. Овозлар — 269 та;
- Навоий вилояти Кармана туманидаги «Ўзбекистон» маҳалласининг Чутқара мавзесида 500 миллион сўмлик сув қувурларини алмаштириш. Овозлар — 8 та.
Изоҳ (0)