Қашқадарё вилоятининг Қарши туманида фаолият юритувчи фермернинг давлат режасидан ташқари тортиб олинган ғалласи қайтарилди. Бу ҳақда «Дарё»га Адлия вазирлиги ахборот хизмати раҳбари Севара Ўринбоева маълум қилди.
Севара Ўринбоеванинг маълумот беришича, фермернинг ҳуқуқи «Фермерга мадад» ҳуқуқий акцияси доирасида амалга оширилаётган ишлар пайтида тикланган.
«Дарё» мухбири билан суҳбатлашган Қарши тумани прокурори Алишер Мирзаевнинг маълумот беришича, фермер ҳуқуқи тикланиб, ғалласи қайтариб берилгач, унга адолатни тиклашда кўмаклашган вилоят прокуратураси ҳамда Қарши туман прокурорига миннатдорлик хати ёзган.
«Жами 78 тонна ғалламни тортиб олишганди. Шундан 40 тоннаси давлат режаси эди. Давлат режасига давлат томонидан белгиланган нарх бўйича ҳақ тўланишига розиман. Аммо режадан ташқари 38 тонна ғалламни ҳам олиб қўйишганига норозилик билдиргандим. Мақола сайтда эълон қилингач, 30 тонна ғалламни қайтариб олдим. Тўғрироғи, тоннасига бозор нархида — 3 миллион 200 минг сўмдан ҳақ тўлашди. Давлат томонидан белгиланган нарх эса тоннасига 1 миллион 500 минг сўм эди», — дейди фермер Содиқ Маматов.
Эслатиб ўтамиз, фермер Содиқ Маматовнинг ғалласи тортиб олингани жамоатчиликка маълум бўлгач, Қарши тумани ҳокимлиги мақолага муносабат билдирганди. Ўшанда ҳокимлик ахборот хизмати раҳбари Тўлқин Турдиев «Кластер масъуллари фермерни рози қиламиз дейишяпти. Давлат нархига 10 фоиз қўшиб бериб, фермер билан келишишларини айтди», — деганди.
Қайд этиш лозим, Қарши туманида фермернинг етиштирган ғалласи тортиб олиниши янгилик эмас. «Дарё» нашри аввал ҳам шундай воқеа ҳақида сўз юритиб, туман ҳокими ғалла режасини бажариш учун чорвачилик фермер хўжалигининг озиқа ғалласини ҳам тортиб олганини ошкор қилганди.
Мавзуга доир: Қарши туман ҳокими Мақсуда Мустафоева ҳайфсан олди
Изоҳ (0)