15 август куни Россиядан хизмат сафаридан қайтиб келган Сурхондарё вилояти ҳокими Тўра Боболов Термиз шаҳрининг қўшни Афғонистон давлати билан чегарадош «Паттакесар»,« Нурли келажак» ҳамда «А.Жомий» маҳаллаларида бўлиб, оқсоқоллар ва меҳнат фахрийлари билан суҳбатлашди, деб хабар бермоқда ЎзА.
Учрашувда вилоят раҳбари қўшни давлатда юзага келган ҳарбий-сиёсий вазият ҳақида атрофлича маълумот бериб, Ўзбекистоннинг давлат чегарасини қўриқлаш ва ҳимоя қилиш кучайтирилган тартибда олиб борилаётганини, Термизда хавфсизлик идоралари раҳбарлари ва давлат ҳокимияти органлари вакилларидан иборат тезкор штаб фаолияти йўлга қўйилиб, қуруқлик ва сувда сарҳадларни қўриқлаш учун барча зарур хавфсизлик чоралари кўрилганини маълум қилди.
«Ҳеч қандай хавотирга ўрин йўқ. Термиз—Ҳайратон кўприги ҳудудида вазият барқарор. Кўприкнинг Афғонистон қисмида тўпланган Афғонистон фуқароларининг асосий қисми кўприкни ва унга туташ ҳудудни мустақил равишда тарк этди. Бунга фаол сиёсий ва дипломатик саъй-ҳаракатлар, шунингдек, олиб борилган тушунтириш ишлари натижасида эришилди», — деган Тўра Боболов.
Учрашувлар якунида вилоят ҳокими чегара ҳудудларда яшаётган аҳолининг турмуш тарзи билан танишиб, уларнинг таклиф ва тавсияларини ҳам эшитган.
Мавзуга доир:
- «Афғонистондаги ўзбеклар учун синовли кунлар бошланди». Қонунчилик палатаси спикери ўринбосари Афғонистондаги вазият ҳақида муносабат билдирди
- «Ихтилофга алоқадор барча томонларни куч ишлатишдан тийилишга ҳамда тинч аҳоли орасида қурбонлар бўлишига йўл қўймасликка чақирамиз» — Мақсуда Ворисова
- «Бошпана сўраган афғонистонлик қочқинлар бўйича инсонпарварлик тамойилларига мос ҳаракат қилиниши лозим» — Алишер Қодиров
- «Афғонистондаги вазият юмшаб, Ўзбекистон манфаатлари ва тинчлиги йўлида ҳал бўлишидан умидвормиз» — сенатор Алишер Саъдуллаев
Изоҳ (0)