Герд Мюллер 15 август куни 75 ёшида вафот этди. Футбол тарихидаги афсонавий ҳужумчилардан бири ўзидан шундай тарихий рекордлар қолдириб кетганки, уларнинг баъзиларини янгилашни иложи йўқ.
Мюллер 1945 йил ноябрь ойида Германиядаги Америка оккупациясида туғилган. Оиладаги олти фарзанднинг кенжаси эди, 15 ёшидаёқ мактабни ташлаб, фабрикада ишлашга мажбур бўлган. Юк автомобили ҳайдовчиси бўлган отаси вафот этган, оилани боқиш учун эса пул жуда зарур эди.
Герд бўш вақтларида футбол билан шуғулланарди. 1960 йилда ўзи туғилган шаҳар — Нердлингеннинг «ТСВ 1861» жамоасида фаолиятини бошлаган. Аввалига ёшлар жамоасида ўйнаган Мюллер 1963/64 йилги мавсумдан бошлаб асосий жамоага ўтказилган. Ўша мавсумнинг ўзидаёқ 47 ўйинда 28 та гол уришга муваффақ бўлган. Ҳозирда «ТСВ 1861» Герд Мюллер номидаги стадионда ўз ўйинларини ўтказади.
Германияда истеъдодли ҳужумчига эътибор кучаяди. Мюнхеннинг асосий жамоаси дарҳол футболчини ўз сафига қўшиб олиш учун ҳаракатни бошлади. Гап «Бавария» ҳақида эмас, ўша вақтларда катта кучга эга бўлган «Мюнхен 1860» ҳақида кетмоқда. «Мюнхен» жамоаси 1963 йилда Бундеслиганинг асосчиларидан бирига айланди, 1964 йилда Германия Кубогини қўлга киритди, 1965 йилда Кубок эгалари Кубоги финалига қадар етиб борди. 1966 йилда эса Бундеслига чемпионига айланди. Аммо маҳаллий лигада ўйнайдиган «Бавария» директори чаққонлик қилди ва Гердга биринчи бўлиб шартнома таклиф қилди.
Ёш ҳужумчи Бундеслига жамоасининг асосий жамоасида ўйнаб кетишига шубҳа қилди ва «Бавария»нинг таклифини қабул қилишни маъқул кўрди. Қўшимчасига Герд Мюнхен мебеллар дўконига ишга қабул қилинди.
Тўғри, у аввалига «Бавария»да ҳам ўйнаб кета олмади — мураббий футболчига ишонч билдирмади. Вақт ўтиши билан Мюллер мураббий хато қилаётганини исботлади. Унинг шериклари «Бавария»нинг бўлажак юлдузлари Франц Беккенбауэр ва Зепп Майер эди. Бир мавсумдан сўнг улар Бундеслигада иштирок этадиган бўлди.
Шу тариқа Герд Мюллер даври бошланди:
- Бундеслигада 365 та гол — бу рекорд ҳалигача янгиланмади (иккинчи ўриндаги Левандовскида 277 та гол мавжуд).
- Бундеслигада 32 та ҳет-трик — бу ҳам рекорд.
- Бундеслигада 7 марта мавсумнинг энг яхши ҳужумчиси бўлган — рекорд.
- 1970 йилда «Олтин тўп», 1970, 1972 йилларда «Олтин бутси»ни қўлга киритган.
Мюллер ўша ўйинда охирги марта терма жамоа либосини кийди. 28 ёшида Герд Мюллер оиласи учун кўпроқ вақт ажратиш мақсадида терма жамоадаги фаолиятини якунлади.
Терма жамоадаги 8 йили мобайнида Мюллер 62 ўйинда 68 та гол урди. Фақатгина Мирослав Клозе ундан кўпроқ гол урган (71). Лекин Клозега бу натижага эришиш учун 13 йил ва 137 ўйин керак бўлди.
1982 йилда фаолиятини якунлаган Мюллер депрессияга тушиб қолди ва ичкиликка берилди. Собиқ жамоадошлари уни даволаниш курсларига боришга кўндирди ва «Бавария II» жамоасида мураббийлик лавозимини берди. Мюллер у ерда 1992 йилдан 2014 йилга қадар ишлади.
Охирги йилларда оғир касалликдан азият чекаётган 75 ёшли фахрий футболчи шарафига бу чиройли ҳаракат эди. 2015 йилда «Бавария» Мюллерни Альцгеймер касаллиги қийнаётгани ҳақида хабар берди. Унинг аҳволи оғирлашиб борарди. Герд қариялар уйида яшарди. Шифокорлар, рафиқаси ва дўсти Паул Брайтнер унга ғамхўрлик қиларди. Мюллер яқинларини танимасди, деярли овқатланмасди, ҳеч ким билан гаплашмасди.
Изоҳ (0)