Гаитида 14 август, шанба куни 7,2 магнитудали зилзила юз берди. Унинг кетидан кетма-кет афтершоклар, хусусан, 5,2 магнитудали такрорий ерости силкинишлари кузатилган, дея хабар бермоқда Meduza.
Зилзила Гаити жануби-ғарбидаги Сен-Луи-дю-Сюд шаҳри яқинида юз берган. Унинг эпицентри 10 километр чуқурликда бўлгани айтилмоқда. Сўнгги маълумотларга кўра, офат оқибатида камида 304 киши ҳалок бўлган, 1,8 мингдан ортиқ тан жароҳати олган; бедарак йўқолганларнинг аниқ сони маълум эмас, қурбонлар сони ортиши мумкин.
АҚШ Геология хизмати шанба куни юз берган ерости силкинишларини «қизил» даража билан баҳолаган — бу даража зилзиланинг «жиддий инсоний йўқотишлар» ва сезиларли талофатлар келтириб чиқариши мумкинлигини билдиради.
АҚШ Океанлар ва атмосфера тадқиқотлари миллий бошқармаси Гаитидаги зилзиладан сўнг цунами юзага келиши мумкинлигидан огоҳлантирган, бироқ кейинроқ цунами хавфи бекор қилинган.
Эслатиб ўтамиз, Гаитида 2010 йили эпицентри пойтахт Порт-о-Пренс яқинида жойлашган 7,0 магнитудали зилзила юз берган эди. Ҳодиса оқибатида 200 мингдан ортиқ одам ҳалок бўлган, 300 мингдан зиёд киши тан жароҳати олган, тахминан ярим миллион одам бошпанасидан айрилган эди.
CNN маълумотига кўра, 14 августдаги зилзила Гаити пойтахти ва унинг аҳоли гавжум ҳудудларидан нисбатан узоқда юз берган. Янги зилзила эпицентридан 100 километр масофада тахминан 2,5 миллион яшайди, 2010 йилги зилзиланинг худди шундай рadiusида салкам 6,5 миллион одам истиқомат қиларди.
Изоҳ (0)