Аргентина биринчи хонимининг карантин даврида нишонлаган туғилган кунидан олинган фотосуратлар эълон қилингач, мамлакат сиёсий доираларида жанжал чиқди. Бу ҳақда «РИА Новости» хабар берди.
Турли нашрларда чоп этилган суратларда тадбирда 12 киши борлиги, улар стол атрофида ниқобсиз ва ижтимоий масофага риоя қилмасдан ўтиргани акс этган.
ТН телеканалининг хабар беришича, фотосуратлар 2020 йилнинг июль ойида мамлакат раҳбари Альберто Фернандес қароргоҳида олинган, ўша пайтда мамлакатда ҳар қандай тадбирлар тақиқланган ва қаттиқ карантин жорий қилинган.
«РИА Новости» суд доираларидаги манбага таяниб, хабар беришича, федерал прокурор қароргоҳга ташриф буюрганлар рўйхатини сўраган.
Кейинчалик, Фернандес ўз баёнотида, карантин пайтида меҳмонларни қабул қилганини тан олди. Унинг сўзларига кўра, тадбирга юзлаб одамлар келган — губернаторлар, вазирлар, актёрлар, футболчилар, ёрдамга муҳтож кишилар.
«Ўн тўртинчи июль, азизам Фабиоланинг туғилган кунида, у қадаҳ кўтариш учун кеча уюштирди, бундай қилмаслик керак эди, бу содир бўлганидан афсусдаман. Бошқа бундай бўлмайди», — деди президент.
Мамлакат Вазирлар Маҳкамаси раҳбари Сантьяго Каферо ўз интервьюсида бу ҳодисани хато деб атади. Мухолифат депутатлари Фернандесга импичмент талаб қилмоқчи.
Аввалроқ Британия соғлиқни сақлаш вазири машуқаси билан карантин қоидаларини бузгани учун истеъфога чиқганди. Шунингдек, Қозоғистонда карантин даврида 500 кишилик тўй ўтказган амалдор ишдан олинган.
Изоҳ (0)