Германия канцлери Ангела Меркель нафақага чиққанидан кейин қарийб 15 минг евро (187 миллион сўмдан ортиқ) пенсия олади. Бу ҳақда Германия солиқ тўловчилар уюшмасининг ҳисоб-китобларига асосланиб, Focus хабар берди.
Уюшма маълумотларига кўра, бу миқдор сиёсатчининг 1990 йилдан бери мунтазам равишда Бундестаг депутати этиб сайланиб келганини ҳамда Германия собиқ канцлери Гелмут Кол ҳукуматида ишлаётганини ҳисобга олган ҳолда қўшилади. Шунингдек, Меркель бу лавозимни қарийб 16 йилдан бери эгаллаб келмоқда.
Германияда канцлер парламент маошининг 65 фоизи миқдорида пенсия олади (ҳозирда тахминан 10 минг евро). Шу билан бирга, Меркелга Германия собиқ канцлери сифатида икки ёрдамчи, котиб ва ҳайдовчидан иборат ўз бюросига эга бўлиш ҳуқуқи берилади.
Аввалроқ Ангела Меркель нафақага чиққанидан кейинги режалари билан бўлишган эди. Меркелнинг таъкидлашича, у «бироз уйқуга тўйиб, табиатда сайр қилишни», кейин нима қилишни истаётганини ҳал қилишни режалаштирган.
2018 йилда сиёсатчи, ҳозирги канцлерлик муддати унинг охирги муддати бўлишини айтган. 2021 йил арафасида Ангела Меркель канцлер сифатида Германия халқига сўнгги марта Янги йил мурожаатини йўллаганди. Меркель 2021 йилнинг сентябрь ойидаги сайловларда қатнашмаслиги ва сиёсатдан нафақага чиқиш ниятини яна бир бор тасдиқлаган.
Изоҳ (0)