Шоир Йўлчи Рўзиев Юлдуз Усмоновадан «Хаста бўлма» шеъри учун 3 йилдан буён қалам ҳақини ололмаётгани ҳақида сўзлаб берди (видео)

Шоир Йўлчи Рўзиев Ўзбекистон халқ артисти Юлдуз Усмонованинг «Хаста бўлма» ҳамда «Севги изҳори» қўшиқлари матни муаллифи ҳисобланади. Юлдуз Усмонова «Хаста бўлма» қўшиғи матнига қалам ҳақи сифатида шоирнинг шеърий тўплами чоп этилишига кўмаклашишга ваъда берган. Бироқ Йўлчи Рўзиев бир неча йиллардан буён санъаткордан шеъри учун қалам ҳақини ололмаяпти. Бу ҳақда у «Human.uz» нашрига берган интервьюсида сўзлаб берди.

2016 йилда ‘Хаста бўлма’ деб номланган шеър ёзганман. Шеърни 2018 йилда Юлдуз Усмонованинг маъмурларига берганман. 2018 йилнинг февраль ойида хонанданинг маъмурлари менга қўнғироқ қилиб, Юлдуз Усмонова шеърингизни қўшиқ қиляпти, розимисиз, деб сўрашган. Гонорар концертдан кейин ёки кейинроқ берилади, дейишди.

Орадан ойлар ва қарангки, йил ҳам ўтиб, 2020 йил ‘Севимли’ телеканалида ‘Севимли Юлдуз’ лойиҳасининг янги йил сонида шу қўшиқни куйлашдан олдин примадоннамиз, халқимизнинг севимли юлдузи — Юлдуз Усмонова томонидан ‘ҳозир эътиборингизга бир қўшиқни ҳавола қилмоқчиман. Жудаям эски шеър, муаллифи ҳам ўтиб кетган бўлса керак, бир йигит, ёши каттароқ эркак аёлига бағишлаб ёзган экан, агар муаллифи топилиб қолса, ҳидлаб-ҳидлаб ўпардим’ деб, шу қўшиқ куйланган. Қизиғи шундаки, бу қўшиқнинг муаллифи эканлигимни Юлдуз Усмонованинг 2018 йилги концерт дастурини аудио ва видео жамланма ҳолатида тарихга муҳрлаган ‘Ohang media’ ташкилоти томонидан мен, яъни ‘Хаста бўлма’ қўшиғи муаллифи Йўлчи Рўзиев эканлигим яққол кўрсатилган эди.Хуллас, 2020 йилниг 1 январь кунининг ўзида Юлдуз Усмонованинг админстраторларига мурожаат қилганимда тайинли жавоб ололмадим. Эртаси куни чамаси кундуз соат 11:00 ларда Юлдуз Усмонованинг турмуш ўртоқлари ва продюсерлари Мансур Агалиев телефон қилиб, кўришиб гаплашиб олишимиз лозимлигини айтди. Улар айтган манзил Наврўз тантаналар уйида экан, офисда кўришдик ва улар менга сизни рози қилишимиз керак, Юлдуз опангиз айтди, китобингизни чиқариб берамиз, мана опангиз билан гаплашинг, деб телефон қилди ва телефон орқали гаплашдик. Шундан кейин Юлдуз Усмонованинг уйларига Мансур Агалиев билан бордик, Юлдуз опа билан кўришдик. Шахсан Юлдуз Усмонованинг ўзлари шеърларингиз кўпми, китоб чиқармайсизми, деди. Кўп дедим, кейинроқ кичикроқ маблағ топсам, чиқарарман деганимда опа айтдиларки, нега кейинроқ, тўплаб, 500 бетли қаттиқ муқовада чиқаринг, мана мен ҳомийлик қиламан, буёғини мана Мансур акангиз билан гаплашаверасиз, мен бу қўшиқнинг орқасидан 100 миллионлаб пул топганман, миллионлаб одамларнинг раҳматини эшитганман, сизга раҳмат, дедилар, сиздаги самимийлик ҳаммада ҳам йўқ,  дедилар. Шундан кейин Мансур ака ўзим бош-қош бўламан, китобни чиқарамиз, деди.

2020 йил 9 январь куни Юлдуз Усмонованинг мусиқий раҳбари Ўткир ака телефон қилиб, ‘Севги изҳори’ номли шеърингиз бор экан, опа шуни қўшиқ қиляптилар, айтиб қўйишимни айтдилар, гонорари берилади деди. Ўйладимки, ‘Хаста бўлма’ ва ‘Севги изҳори’ шеърларимга ўзлари киритган таклиф — китоб чиқариб беришса керак, деб. Шундан кейин Мансур Агалиев билан китоб чиқариш масаласида бир неча бор учрашдим, олдин китобни концертгача чиқариб, ‘Халқлар дўстлиги’ санъат саройида мухлислар кириш йўлагида тақдим қиламиз, дейишди. Кейин ҳозир иш кўп деб, Носир ака билан китоб чиқариш масаласида учрашишимни айтди. Хуллас, Носир ака нашриёт билан гаплашдим деди, Мансур қиммат деб айтди дедилар. Мансур ака билан гаплашсам, 20 миллион деяптикан, 10 миллионлигидан топинг, деди. Унақа нархда катта ҳажмдаги китобни ҳеч бир нашриёт чиқармас экан десам, кейин гаплашамиз деди. Шундан кейин бу масала очиқлигича қолди.

Юлдуз Усмонованинг уйларига 50 мартача бордим. Ҳар гал борганимда уларнинг ҳеч бири билан қоровуллар ҳамда Отабек Шамс учраштиришга йўл қўймади ёки буйруқ шундай бўлган, буёғи Аллоҳга аён. Охири яна мусиқа раҳбари Ўткир акага телефон қилганимда концертдан кейин, деди. Концертдан кейин бир неча юз бора телефон қилдим, Мансур ака кўтармайдилар. Юлдуз Усмонованинг уйларига, ёлғон эмас, камида ўн маротаба бордим, уйда йўқ, кайфиятлари йўқ, кейин келинг, Мансур акани сўрасам, йўқ. Хуллас, мана шунақа гаплар. Балки бу ҳолатлардан Юлдуз Усмонова бехабардир. Опага борадиган барча йўлларни унинг ёнидаги жамоа тўсаётган бўлиши мумкин.

Йўлчи Рўзиев, шоир