Shoir Yo‘lchi Ro‘ziyev O‘zbekiston xalq artisti Yulduz Usmonovaning “Xasta bo‘lma” hamda “Sevgi izhori” qo‘shiqlari matni muallifi hisoblanadi. Yulduz Usmonova “Xasta bo‘lma” qo‘shig‘i matniga qalam haqi sifatida shoirning she’riy to‘plami chop etilishiga ko‘maklashishga va’da bergan. Biroq Yo‘lchi Ro‘ziyev bir necha yillardan buyon san’atkordan she’ri uchun qalam haqini ololmayapti. Bu haqda u “Human.uz” nashriga bergan intervyusida so‘zlab berdi.
2016-yilda ‘Xasta bo‘lma’ deb nomlangan she’r yozganman. She’rni 2018-yilda Yulduz Usmonovaning ma’murlariga berganman. 2018-yilning fevral oyida xonandaning ma’murlari menga qo‘ng‘iroq qilib, Yulduz Usmonova she’ringizni qo‘shiq qilyapti, rozimisiz, deb so‘rashgan. Gonorar konsertdan keyin yoki keyinroq beriladi, deyishdi.Oradan oylar va qarangki, yil ham o‘tib, 2020-yil ‘Sevimli’ telekanalida ‘Sevimli Yulduz’ loyihasining yangi yil sonida shu qo‘shiqni kuylashdan oldin primadonnamiz, xalqimizning sevimli yulduzi — Yulduz Usmonova tomonidan ‘hozir e’tiboringizga bir qo‘shiqni havola qilmoqchiman. Judayam eski she’r, muallifi ham o‘tib ketgan bo‘lsa kerak, bir yigit, yoshi kattaroq erkak ayoliga bag‘ishlab yozgan ekan, agar muallifi topilib qolsa, hidlab-hidlab o‘pardim’ deb, shu qo‘shiq kuylangan. Qizig‘i shundaki, bu qo‘shiqning muallifi ekanligimni Yulduz Usmonovaning 2018-yilgi konsert dasturini audio va video jamlanma holatida tarixga muhrlagan ‘Ohang media’ tashkiloti tomonidan men, ya’ni ‘Xasta bo‘lma’ qo‘shig‘i muallifi Yo‘lchi Ro‘ziyev ekanligim yaqqol ko‘rsatilgan edi.Xullas, 2020-yilnig 1-yanvar kunining o‘zida Yulduz Usmonovaning adminstratorlariga murojaat qilganimda tayinli javob ololmadim. Ertasi kuni chamasi kunduz soat 11:00 larda Yulduz Usmonovaning turmush o‘rtoqlari va prodyuserlari Mansur Agaliyev telefon qilib, ko‘rishib gaplashib olishimiz lozimligini aytdi. Ular aytgan manzil Navro‘z tantanalar uyida ekan, ofisda ko‘rishdik va ular menga sizni rozi qilishimiz kerak, Yulduz opangiz aytdi, kitobingizni chiqarib beramiz, mana opangiz bilan gaplashing, deb telefon qildi va telefon orqali gaplashdik. Shundan keyin Yulduz Usmonovaning uylariga Mansur Agaliyev bilan bordik, Yulduz opa bilan ko‘rishdik. Shaxsan Yulduz Usmonovaning o‘zlari she’rlaringiz ko‘pmi, kitob chiqarmaysizmi, dedi. Ko‘p dedim, keyinroq kichikroq mablag‘ topsam, chiqararman deganimda opa aytdilarki, nega keyinroq, to‘plab, 500 betli qattiq muqovada chiqaring, mana men homiylik qilaman, buyog‘ini mana Mansur akangiz bilan gaplashaverasiz, men bu qo‘shiqning orqasidan 100 millionlab pul topganman, millionlab odamlarning rahmatini eshitganman, sizga rahmat, dedilar, sizdagi samimiylik hammada ham yo‘q, dedilar. Shundan keyin Mansur aka o‘zim bosh-qosh bo‘laman, kitobni chiqaramiz, dedi.
2020-yil 9-yanvar kuni Yulduz Usmonovaning musiqiy rahbari O‘tkir aka telefon qilib, ‘Sevgi izhori’ nomli she’ringiz bor ekan, opa shuni qo‘shiq qilyaptilar, aytib qo‘yishimni aytdilar, gonorari beriladi dedi. O‘yladimki, ‘Xasta bo‘lma’ va ‘Sevgi izhori’ she’rlarimga o‘zlari kiritgan taklif — kitob chiqarib berishsa kerak, deb. Shundan keyin Mansur Agaliyev bilan kitob chiqarish masalasida bir necha bor uchrashdim, oldin kitobni konsertgacha chiqarib, ‘Xalqlar do‘stligi’ san’at saroyida muxlislar kirish yo‘lagida taqdim qilamiz, deyishdi. Keyin hozir ish ko‘p deb, Nosir aka bilan kitob chiqarish masalasida uchrashishimni aytdi. Xullas, Nosir aka nashriyot bilan gaplashdim dedi, Mansur qimmat deb aytdi dedilar. Mansur aka bilan gaplashsam, 20 million deyaptikan, 10 millionligidan toping, dedi. Unaqa narxda katta hajmdagi kitobni hech bir nashriyot chiqarmas ekan desam, keyin gaplashamiz dedi. Shundan keyin bu masala ochiqligicha qoldi.
Yulduz Usmonovaning uylariga 50 martacha bordim. Har gal borganimda ularning hech biri bilan qorovullar hamda Otabek Shams uchrashtirishga yo‘l qo‘ymadi yoki buyruq shunday bo‘lgan, buyog‘i Allohga ayon. Oxiri yana musiqa rahbari O‘tkir akaga telefon qilganimda konsertdan keyin, dedi. Konsertdan keyin bir necha yuz bora telefon qildim, Mansur aka ko‘tarmaydilar. Yulduz Usmonovaning uylariga, yolg‘on emas, kamida o‘n marotaba bordim, uyda yo‘q, kayfiyatlari yo‘q, keyin keling, Mansur akani so‘rasam, yo‘q. Xullas, mana shunaqa gaplar. Balki bu holatlardan Yulduz Usmonova bexabardir. Opaga boradigan barcha yo‘llarni uning yonidagi jamoa to‘sayotgan bo‘lishi mumkin.
Yo‘lchi Ro‘ziyev, shoir
Izoh (0)