«Муҳташам юз йил» сериалида Афифа Хотун ролини ижро этган турк актрисаси мия саратонидан вафот этди

Турк актрисаси Сабина Тозия 76 ёшида мия саратонидан вафот этди. Бу ҳақда унинг ҳамкасби актриса Марям Узерли хабар берди, деб ёзмоқда Starhit.

Маълум бўлишича, Тозия 2021 йилнинг январь ойида касалхонага ётқизилган. Шифокорлар беморнинг миясида ўсимта борлигини аниқлаган. Бу хабарни эшитган актриса ўзини йўқотиб қўймади, аксинча ўзгалар эътиборини тортмасликка ҳаракат қилди. У фильмлар ва тадбирлар иштирок этишни тўхтатди, блог юритишдан воз кечди.

Тозия болалигидан актриса бўлишни орзу қилар эди, лекин ўз мақсадига фақат балоғат ёшига етгачгина эришди. Сўнгги йилларда у бир қанча йирик лойиҳаларда, жумладан, «Она жароҳати» фильмида рол ўйнашга муваффақ бўлди.

Дўстлари, ҳамкасблари ва мухлислар сериал юлдузининг оиласига ҳамдардлик билдиришган. Биринчилардан бўлиб Мерем Узерли чуқур қайғуда эканини ёзган.

«Биз учта ажойиб лойиҳада бирга рол ижро этдик: «Муҳташам юз йил», «Она жароҳати», «Ёмонлик дунёга устун бўлолмас». Ўлимингиздан юрагим синди. Сизни жуда яхши кўрардим. Охиратингиз обод бўлсин, азизим Сабина», — деб ёзган актриса ўз саҳифасида.

Сабина Тозия «Ёмонлик дунёга устун бўлолмас» сериалининг суратга олиш жараёнларида иштирок этаётган эди. Бироқ бир неча ой олдин соғлиғи билан боғлиқ муаммолари туфайли ишни тўхтатишга мажбур бўлган. Актриса ўсимтани олиб ташлаш учун қилинган катта операцияни бошидан ўтказди ва тўрт кун реанимацияда ётди. Операция яхши ўтди, мухлислар севимли актрисаларининг экранга қайтишига умид қилишди, лекин тез орада бемор фалаж бўлиб қолди.

https://www.instagram.com/p/CSaHugVIjyE/

«Ёмонлик дунёга устун бўлолмас» фильмида Тозиянинг ўғли ролини ўйнаган Ўқтай Қайнаржа фожиали хабардан ўзини йўқотиб қўйганини айтади. «Бу синовлардан қандай ўтишимни билмайман. Мендаги туйғуларни тасвирлаб беришнинг иложи йўқ. Бу катта бўшлиқ, ҳеч нарса йўқ, томоғимга нимадир тиқилиб қолди», — дейди актёр ўз шахсий блогида.