Судан ҳукумати мамлакат собиқ президенти Умар Ал-Башир ва яна бир нечта шахсни Халқаро жиноят суди (ХЖС) ихтиёрига топширади, суд 2003 йилда Дарфурда юз берган қонли воқеалар, Ал-Баширнинг инсониятга қарши ҳамда ҳарбий жиноятлари юзасидан айблов эълон қилади. Бу ҳақда «Интерфакс» хабар берган.
«Судан Вазирлар Маҳкамаси қидирувдаги шахсларни Халқаро жиноят суди ихтиёрига топширишга қарор қилди», — деган Судан ташқи ишлар вазири Марям ал-Маҳдий.
77 ёшли Ал-Башир Судан давлат раҳбарлигига 1989 йилда келган ва 2019 йилда уни бир неча ой давом этган халқ норозиликларидан кейин бошқарувдан четлатгунларига қадар президентлик қилган. ХЖС 2009 йилда Ал-Баширни ҳибсга олишга ордер берган ва ўшанда у халқаро қидирувга берилган эди.
Июль ойида ХЖС Ал-Баширнинг Дарфурдаги қонли воқеалар бўйича суд қилинадиган энг биринчи айбдорлардан бўлишини маълум қилган. Собиқ президентнинг жиноят ишида жами 31 та банддан иборат айбловлар: зўрлаш, қийноққа солиш ва қотиллик жиноятлари мавжуд.
БМТ берган маълумотларга кўра, 2003—2006 йилларда исёнчилар ва ҳукумат қўшинлари иштирокида юз берган Дарфурдаги низо оқибатида, тахминан, 300 мингга яқин одам ҳалок бўлган ва 2,5 миллион аҳоли бошқа ерларга, хорижга кўчиб кетган.
2019 йил августдан буён Суданни ҳарбий-фуқаролик администрацияси бошқариб келмоқда ва ҳукумат Ал-Башир ҳукмронлиги давридаги қонли жиноятлар қурбонлари учун адолат қарор топишини ваъда қилган.
Изоҳ (0)