Туркистон—Чимкент—Тошкент тезюрар темир йўлини қуриш лойиҳаси устида иш олиб борилмоқда. Қозоғистон президенти матбуот хизматининг хабар беришича, бу ҳақда президент Қосим-Жўмарт Тўқаев Туркманистондаги «Аваза» миллий сайёҳлик зонасида 6 август куни Марказий Осиё давлатлари раҳбарларининг учинчи Маслаҳат учрашувида маълум қилди.
«Ўзбекистон билан янги лойиҳалар устида иш олиб борилмоқда. Биринчи навбатда гап Туркистон—Чимкент—Тошкент тезюрар темир йўли ҳақида кетмоқда (лойиҳа қиймати 700 миллион доллар атрофида). Аввалроқ биз ўзбек шерикларимиз учун Қўриқ ва Ақтау портларига қисқа йўлни очган Бейнеу—Ақжигит автомобиль йўли қурилишини якунлагандик», — деган Қосим-Жўмарт Тўқаев.
Унинг таъкидлашича, Жаҳон банки маълумотларига кўра, Марказий Осиёда транспорт коммуникацияларини ривожлантириш ушбу минтақадаги барча давлатларда ЯИМ ўсишини 15 фоизга таъминлаши мумкин.
«Бу улкан захира, шунинг учун биз биргаликда минтақанинг транспорт алоқасини оширишимиз ва транзит шароитларини изчил яхшилашимиз керак», — деган Қозоғистон президенти.
Изоҳ (0)