Эроннинг Ганава портида юз берган ёнғин натижасида бирйўла бешта савдо кемаси ёниб кетди. Улардан тўрттасининг бортида юк бўлган, бешинчи кема юк олиш учун навбатда турган, деб ёзади IRNA.
Хабарга кўра, ҳодиса 5 август куни эрталаб соат бешлар атрофида содир бўлган.
«Ганава портига кираверишда кўплаб кемалар лангар ташлаганини ҳисобга олиб, ёнаётган кемаларни четга олиш ва қолганларини қутқариш учун кўп меҳнат қилишимизга тўғри келди», — деди порт мери Голамрезу Меҳржу.
Қайд этилишича, портга кираверишда мингдан ортиқ кема бўлган. Расмийлар ҳодиса юзасидан тергов ишларини бошлаган.
Дубайдаги Жабал Али портида 7 июлдан 8 июлга ўтар кечаси кучли портлаш юз берганди. Портга лангар ташлаган нефть ташувчи кема бортидаги контейнерлардан бирида ёнғин чиққан, бу эса портлашга сабаб бўлган. Таъкидланишича, контейнерда ёнувчи материаллар бўлган. Амирлик ҳукумати полиция маълумотига таяниб, ёнғин 130 та контейнер сиғадиган кичик кемада содир бўлганини айтган.
Аввалроқ Pemex нефть-газ компаниясининг Мексика кўрфазидаги денгиз қувур линиясида кучли ёнғин содир бўлгани хабар қилинганди, ёнғин 78 метр чуқурликдаги сув остидан кўтарилган.
Изоҳ (0)