«Толибон» Кобулда Афғонистон мудофаа вазирининг уйига уюштирилган ҳужумдан кейин энди ҳукумат амалдорларига «уруш эълон қилганини» билдирди. Бу ҳақда «Толибон» вакили Забиулла Мужоҳид маълум қилган, деб ёзмоқда «РИА Новости».
Афғонистон мудофаа вазири генерал Бисмилло Хон Муҳаммадийнинг уйига уюштирилган ҳужум оқибатида 8 нафар одам ҳалок бўлган ва 20 киши турли даражадаги жароҳатланганди. «Толибон» ушбу қуролли ҳужум учун масъулиятни ўз зиммасига олган.
«Ушбу ҳужум ҳукумат етакчилари ва муҳим шахсларга қарши жавоб операцияларининг бошланиши», – деб ёзган Мужоҳид Twitter’да.
Кобулда содир бўлган воқеага гувоҳ бўлган «РИА Новости» манбаси Афғонистонда вазирнинг уйи олдида дастлаб автомобиль портлатилган, кейинчали қуролланган жангарилар уйга ҳужум уюштиргани ҳақида ахборот берган. Муҳаммадий ўзига ҳам, оила аъзоларига ҳам ҳужум оқибатида зарар етмаганини билдирган.
Аввал Афғонистоннинг Ҳелманд вилоятида бир суткада 40 нафар тинч фуқаро ҳалок бўлгани, аҳолидан уйларини тарк этиш сўралаётгани ҳақида хабар берилган.
Изоҳ (0)