Камбағал мамлакатларда вакциналар етишмаётгани туфайли Жаҳон соғлиқни сақлаш ташкилоти (ЖССТ) коронавирусга қарши қайта эмлашга мораторий киритишни тавсия қилмоқда. Бу ҳақда ЖССТ раҳбари Тедрос Гебрейесус баёнот берди.
Май ойида ЖССТ дунёнинг ҳар бир мамлакатидаги аҳолининг камида 10 фоизини сентябрь охиригача эмлашга чақирганди.
Агар май ойида баъзи ривожланган мамлакатларда ҳар 100 кишига 50 дозадан вакцина юборилган бўлса, август ойининг бошига келиб вакцинация даражаси тўлиқ эмлаш ва қайта эмлашларни ҳисобга олган ҳолда ҳар 100 кишига 100 дозага яқинлашди.
Аксарият камбағал мамлакатларда эса ҳозир ҳар 100 кишига 1,5 та инъекция тўғри келади. Шу муносабат билан, Гебрейесус ЖССТ томонидан қўйилган мақсадга эришиш учун ривожланган давлатлар ҳеч бўлмаганда сентябрь ойининг охиригача қайта эмлашдан воз кечиши кераклигини айтди.
Шунингдек, ЖССТ раҳбари вакцина ишлаб чиқарувчиларга энг камбағал мамлакатларга дори-дармон етказиб берувчи COVAX дастурига эътибор қаратишни тавсия қилди.
АҚШ ҳукумати ЖССТнинг коронавирусга қарши қайта эмлашга мораторий жорий этиш таклифини «нотўғри танлов» деб ҳисобламоқда. Бу ҳақда Оқ уй матбуот котиби Жен Псаки брифинг чоғида айтиб ўтган.
«Агар Жаҳон соғлиқни сақлаш ташкилоти аҳолининг қайсидир қисмига қўшимча дозалар зарур деган қарорда бўлса, биз уларни ҳам берамиз. Биз мораторийни нотўғри танлов деб ҳисоблаймиз», — деди Псаки журналистнинг тегишли саволига жавоб бериб.
Унинг сўзларига кўра, АҚШда вакциналар етарли. Шунингдек, Америка Қўшма Штатлари, агар керак бўлса, ўз мамлакатида ревакцинация дастурини тўхтатмасдан ҳам, вакцинага муҳтож мамлакатларга қўшимча дозадаги препаратларни таклиф қилиши мумкин.
Ҳозирча фақат Исроилда расман қайта эмлаш кампанияси бошланди. Исроилда коронавирусга қарши вакцинанинг икки дозали курсини камида беш ой аввал олган 60 ёшдан катта одамлар Pfizer / BioNTech вакцинасининг учинчи дозаси билан қайта эмланади. Бошқа кўплаб ривожланган мамлакатларда, қайта эмлаш бошланмаган бўлса-да, бу масала муҳокама қилинмоқда.
ЖССТнинг фикрича, бунинг ўрнига, ривожланган давлатлар вакциналарни камбағал давлатлар билан бўлишиши керак. Шу орқали коронавируснинг қайтадан кенг авж олиши ва янги штаммлар пайдо бўлишининг олдини олиш мумкин бўлади.
Изоҳ (0)