Польшанинг Коссян шаҳрида 1987 йилда ишлаб чиқарилган сарғиш «ЗАЗ-968М» сотувга қўйилди, деб хабар беради Motor. Идеал ҳолатда сақланган, деярли бутун «умри» давомида гаражда сақланган «Запорожец» 17 минг еврога баҳоланмоқда. Бу пулга Ўзбекистонда янги Chevrolet Tracker харид қилиш мумкин.
Суратларга кўра, «Запорожец» ажойиб ҳолатда сақланган. Автомобиль салони ва кузовида кўзга ташланадиган нуқсонлар йўқ. Сотувчининг сўзларига кўра, автомобилнинг барча техник қисмлари заводдан чиққанидан бери сақланиб қолган ва соз ҳолатда. Эълонда кўрсатилишича, машинага 68 от кучини тақдим этувчи мотор ўрнатилган, бироқ «ЗАЗ-968М»га ҳеч қачон бундай агрегат ўрнатилмаган. Мазкур модификациядаги «Запорожец»нинг моторлари 50 от кучига эга бўлган.
34 йиллик «ЗАЗ-968М» асосан ҳаракатсиз ҳолда гаражда сақланган. Шу сабаб автомобиль ҳозирга қадар 17 километргина йўл босган. Машина эгасининг таъкидлашича, унинг нусхаси Европадаги энг яхши сақланган «Запорожец»лардан бири.
Сотувчи ўзининг «вақт капсуласи»ни 17 минг еврога баҳолаган.
Аввалроқ Британия аукционида 52 йиллик «Запорожец» 11 минг долларга сотилаётгани, АҚШда букри «Запорожец» 18 минг доллар қийматида сотувга қўйилгани тўғрисида хабар берилганди.
Мавзуга доир:
Изоҳ (0)