Санкт-Петербургда 1986 йилда ишлаб чиқарилган «Москвич» базасида яратилган купе кузовидаги қўлбола маслкар сотувга қўйилди. Модификация жараёнида муҳандислар BMW ва Toyota эҳтиёт қисмларидан фойдаланган. Ўзига хос автомобилни 765 минг рублга (10 минг доллар) харид қилиш мумкин, деб хабар беради Motor. Бу пулга базавий жамланмадаги янги Lada Vesta’ни харид қилса бўлади.
Классик «Москвич»ни купега айлантириш учун конструкторлар орқа эшикларни олиб ташлаган, шунингдек, марказий қисмдаги усунлар силжитилган. Муҳандислар автомобиль кузовини ўз чизмалари асосида шиша пластикдан тайёрлаган. Уч эшикли маскар совет модели эканлигини оригинал радиатор панжарасидаги «АЗЛК» ёзуви ва заводда ўрнатилган оптикаси орқали фарқлаш мумкин. Машина интерьеридаги деталларнинг аксариятини лойиҳа иштирокчилари мустақил яратган. Бироқ чарм ўриндиқлар BMW моделларининг биридан олинган.
«Москвич» Toyota’нинг 280 от кучини тақдим этишга қодир 2,5 литрли 1 JZ-GТЕ мотори ёрдамида ҳаракатга келади. Агрегат BMW’нинг олти поғонали механик узатмалар қутиси ёрдамида бошқарилади. Бундан ташқари, муҳандислар «подвеска» конструкциясида Э36 кузовидаги 3-серияга кирувчи Бавария седаниникидан фойдаланган. Автомобильга 18 дюймли ғилдирак дискалари кийгизилган.
Сотувчининг сўзларига кўра, қўлбола маслкар умумий фойдаланишдаги йўлларда ҳаракатланиш учун ЙҲХББдан барча керакли рухсатномаларни олган. Натижада 100 минг километр йўл босган машина 765 минг рублга баҳоланган.
Аввалроқ Россияда ярим тиркамали қўлбола тракторга айлантирилган «Москвич» топилгани, пикап кузовидаги 25 йиллик ноёб «Москвич» 12 минг долларга сотилаётгани тўғрисида хабар берилганди.
Изоҳ (0)