Ижтимоий тармоқда «Тошкентда ГАИ ҳайдовчига ташланди» сарлавҳаси остида тарқалган видео юзасидан маълумот берилди.
Маълум қилинишича, 2021 йилнинг 31 июль куни Тошкент шаҳар ИИББ ЙҲХБ ЙПХ ходими Б.Мирзараҳимов Шайхонтоҳур тумани ҳудудида жойлашган «Чорсу» жарима майдончаси рўпарасида Cobalt русумли автомобилни тўхтатган.
Текширув давомида ЙПХ ходими ҳайдовчига қарздорлик сабаб автомобилни жарима майдонига жойлашини айтган.
Ҳайдовчи жарималарга ҳали 60 кун бўлмагани, яъни жарималарни тўлаш муддати ҳали ўтиб кетмаганини маълум қилиб, ходим адашганини айтган.
Шундан сўнг ходим жарима тўлаш муддатида янглишганлигини айтиб, ҳайдовчига кетиши мумкинлигини маълум қилган. Ҳайдовчи ЙПХ ходимига эътироз билдирган ва ушбу вақтда ўзаро тортишув юзага келган.
Мазкур ҳолат юзасидан Тошкент шаҳар ИИББ ЙҲХБ масъуллари томонидан хизмат текшируви тайинланган.
Бундан аввал Олмалиқда ЙПХ ходими «25 марта радарга тўлаган» қоидабузар аёлни «Абдураззоқ ака»дан бўлган қўнғироқ сабаб қўйиб юборгани, Олмалиқда ЙПХ ходимига қоидабузар Malibu’ни қўйиб юборишни буюрган командир интизомий жазога тортилгани ҳамда Тошкентда ҳайдовчини тегишли белги қўйилмаган йўлда қоида бузганликда айблаган ЙПХ ходимига хизмат текшируви тайинлангани ҳақида хабар берилганди.
Изоҳ (0)