ЮНЕСКО Ўзбекистонга Шаҳрисабз тарихий марказини тиклаш учун яна бир йил муддат берди

ЮНЕСКО Жаҳон мероси қўмитаси карантин чекловлари шароитида Ўзбекистон томондан барча вазифаларни амалга ошириш учун кўпроқ вақт талаб этилишини инобатга олган ҳолда «Шаҳрисабз тарихий маркази» объектини тиклаш бўйича вазифалар ижроси муддатини яна бир йилга узайтирди.

Туризм ва спорт вазирлиги ахборот хизматининг хабар беришича, бу ҳақда Хитойнинг Фучжоу шаҳрида бўлиб ўтган ЮНЕСКО Жаҳон мероси қўмитасининг кенгайтирилган 44-сессиясида маълум қилинган.

Шаҳрисабзнинг тарихий маркази 2016 йилда ЮНЕСКО томонидан Умумжаҳон мероси объектлари рўйхатига киритилганди. Қўмитанинг 2016 йилнинг июлида ўтказилган 40-сессиясида Шаҳрисабз тарихий маркази Умумжаҳон меросининг хавф остидаги объектлар рўйхатига киритилди. Бунга қурилиш ишларида ЮНЕСКОнинг бутунжаҳон маданий ва табиий меросни муҳофаза қилиш тўғрисидаги конвенциясига риоя этилмагани сабаб бўлган.Шундан буён Шаҳрисабз хавф остидаги объект рўйхатида қолдирилди.

2019 йилда Ўзбекистон томони икки йил ичида шаҳарни регенерация қилиш бўйича режа лойиҳасини ишлаб чиқиш мажбуриятини олди. 2021 йилда ўтказилган сессияда ушбу муддат яна бир йилда узайтирилди.

Сессия давомида шунингдек Ўзбекистоннинг Жаҳон мероси рўйхатига киритиш учун таклиф қилинган объектлари бўйича янгиланган рўйхат тасдиқланган. Дастлабки рўйхат Республика бўйлаб жойлашган 32 маданий, табиий ва маданий-табиий (аралаш) мерос объектини ўз ичига олган, бу минтақанинг бошқа давлатларига нисбатан энг юқори кўрсаткичдир.

Маълумот учун, Россияда бу кўрсаткич — 28, Украинада — 17, Тожикистонда — 17, Қозоғистонда — 14, Туркманистонда — 10 та, Озарбайжонда — 10 та, Арманистонда — 4 та ва Қирғизистонда 2 тани ташкил қилади.