Президент Шавкат Мирзиёев раислигида ўтаётган видеоселектор йиғилишида биринчи ярим йиллик натижалари асосида йил охирига қадар ҳудудлар ва тармоқларда барқарор иқтисодий ўсишни таъминлаш бўйича аниқ чоралар белгилаб олинмоқда.
Давлат раҳбари таъкидлашича, ўтган 6 ойда ялпи ички маҳсулот 6,2 фоизга ўсган. Бунга асосан саноат 8,5 фоиз, инвестициялар 5,9 фоиз ва хизматлар ҳажми 8 фоизга ошгани ҳисобига эришилди. Инфляция даражаси 10,9 фоизни ташкил этди.
Мавзуга доир: «Иқтисодий ўсиш камида 6 фоиз бўлиши учун масъуллар қўшимча захираларни топиши керак» — Шавкат Мирзиёев
Бундан ташқари, озиқ-овқат саноати маҳсулотлари ишлаб чиқариш ҳажми республикада жами 14,7 фоизга ошган.
Ҳудудий инвестиция дастурлари доирасида биринчи ярим йилликда прогнозга нисбатан 2,5 баробар кўп ёки 5 минг 246 та лойиҳа амалга оширилган.
Ҳисобот даврида мамлакатда жами 53 минг янги кичик тадбиркорлик субъектлари ташкил этилиб, 2020 йилга нисбатан 14 фоизга ошган.
2021 йил биринчи ярим йилликда эса 190 минг гектар қўшимча ер майдонлари ўзлаштирилди. 2020 йилнинг биринчи ярмига нисбатан хизматлар кўрсатиш ҳажми 18,3 фоизга ошди.
Президент ҳудудлар ва тармоқларни барқарор ривожлантириш учун яратилаётган молиявий ва иқтисодий шароитларни санаб ўтди.
Жумладан, саноат тармоқларига бир ярим йил давомида 50 триллион сўмдан зиёд божхона имтиёзлари ва тариф преференциялари берилган. Биргина автомобиль саноатига 9,5 триллион сўмлик, нефть-газ тармоғига 2,8 триллион сўмлик божхона имтиёзлари тақдим этилган.
Сўнгги 3 йилда қишлоқ хўжалигига 1,5 триллион сўм субсидия ажратилди. Қишлоқ хўжалигини барча йўналишларида кластер тизими жорий қилиниб, уларга 2021 йилнинг ўзида 6 триллион сўмдан зиёд кредитлар берилди.
Чорвачилик соҳасида бошқарув Ветеринария қўмитасига берилиб, унинг таркибида алоҳида агентлик ташкил қилинди. Сўнгги 3 йилда соҳага 350 миллион долларга яқин имтиёзли маблағлар жалб этилди.
Хизматлар соҳасини ривожлантириш бўйича алоҳида Президент қарори қабул қилиниб, тадбиркорлар учун зарур имтиёзлар ва барча имкониятлар яратиб берилди. Хусусан, биринчи босқичда 7 та тижорат банкига 1 триллион 575 миллиард сўм маблағ ажратилди.
Давлат раҳбари йиғилишда автомобилсозлик, энергетика, кимё саноати, қурилиш материаллари ишлаб чиқариш, тўқимачилик, чарм саноати, фармацевтика, қишлоқ хўжалиги, жумладан, картошкачилик, мева-сабзавотчилик, узумчилик, пахтачилик, ғаллачилик, чорвачилик, паррандачилик, озиқ-овқат саноати, хизмат кўрсатиш, тадбиркорлик соҳаларини ривожлантириш бўйича аниқ вазифаларни белгилаб берди.
Йирик тармоқ саноат корхоналарида 86 триллион сўмлик маҳсулот ишлаб чиқариш, электр энергияси генерация қувватларини 1 минг 800 мегаваттга ошириш, йирик маҳаллий саноат корхоналарида 60 триллион сўмлик юқори қўшилган қийматга эга маҳсулот ишлаб чиқариш, тўқимачиликда 15,3 триллион сўмлик маҳсулот ишлаб чиқариш ва 1,7 миллиард долларлик экспортни таъминлаш, 3,5 миллион тонна пахта етиштириш, 1,5 миллион тонна гўшт, 6,5 миллион тонна сут ишлаб чиқариш, 1 минг 113 та маҳаллани жамоат транспорти билан қамраб олиш, йиллик инфляция даражасини прогноз кўрсаткичлари – 10 фоиз доирасида бўлишини таъминлаш шулар жумласидан.
Бош вазир ўринбосарлари, тармоқ ва ҳудудлар раҳбарлари кун тартибидаги масалалар юзасидан ҳисобот берди.
Бундан аввал Ўзбекистон истеъмол бозоридаги товарлар ва хизматлар июнь ойида ҳам ўртача 0,2 фоизга арзонлашгани ҳамда Ўзбекистонда яқин ойларда дори-дармонлар, тиббий хизматлар ва асосий озиқ-овқат маҳсулотлари нархлари кескин ошиши мумкинлиги ҳақида хабар берилганди.
Изоҳ (0)