Андижон вилояти Олтинкўл туманида талабанинг ўқишини кўчиртириб беришни ваъда қилган фирибгар талаба ушланди, дея хабар бермоқда Бош прокуратура ҳузуридаги Департамент матбуот хизмати.
Департаментнинг Олтинкўл туман бўлими томонидан ИИБ ходимлари билан ҳамкорликда ўтказилган тезкор тадбирда Андижон давлат университети талабаси С.Э. фуқаро М.нинг ишончига кириб, унинг Ўш технологиялар университетидаги ўқишини Наманган давлат университетига юқори лавозимда ишловчи танишлари орқали кўчиртириб бериш эвазига 1500 АҚШ долларини фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Бундан аввал Самарқанд ва Қашқадарёда пул эвазига ўқишга киритиб қўйишни ваъда қилган шахслар ушлангани, Хоразмда тотализатор орқали қўлга киритган 4 та уй ва 3 та машинани фарзандлари номига расмийлаштирган фуқарога жиноят иши қўзғатилгани ҳамда Сурхондарё ва Фарғонада фуқароларни ўқишга киритиб қўйиш эвазига пул сўраган талабалар ушлангани ҳақида хабар берилганди.
Изоҳ (0)