Самарқанд шаҳрида учта уйда ёнғин келиб чиқди. Уларнинг бири деярли тўлиқ ёниб кетган. Бу ҳақда STV телеканали хабар қилди.
Қайд этилишича, 72 ёшли Саида Сатторова уч ҳафтадан буён очиқ осмон остида — мактаб боғида тунашига тўғри келмоқда. Ҳозирда аёл ва унинг оиласи Самарқанд шаҳридаги 3-умумтаълим мактаби ҳудудига жойлашган. Бунга 9 июль куни янги газ ҳисоблагичини ўрнатиш пайтида келиб чиққан ёнғин сабаб бўлган.
Ўша куни эрталаб уй эгалари ҳузурига пайвандчилар келиб АСКУГ тизимига уланган «ақлли» ҳисоблагични ўрнатишлари ҳақида огоҳлантирган. Нафақахўрнинг айтишича, ўрнатиш жараёни бошидан нотўғри кетган. Ўрнатувчи томонидан ёнғинга қарши чоралар кўрилмаган. Пайвандчилар газ қувурини кесишни бошлаганда, кичик ёнғин чиққан.
25 дақиқадан кўпроқ вақт давомида олов деярли бутун уйни қамраб олган, аввал ёнида газ қурилмаси ўрнатилган дўкон ёнган. Олов тобора кўпроқ майдонни қамраб олиб, қўшни уйларга ўта бошлаган. Воқеа оқибатида 100 квадрат метр майдондаги маиший техника ва мол-мулк бутунлай ёниб кетган.
Ўша куни Сатторовлар оиласида газ ҳисоблагичини ўрнатиш 2008 йилдан буён фаолият юритаётган «Мароқандгазҳисоблагичсервис» МЧЖ ходимлари томонидан амалга оширилган. Корхона тендер орқали уйларга газ ҳисоблагичларини ўрнатиш имкониятига эга бўлган.
Корхона раҳбари Шаҳобиддин Ширинов айбни тан олиб, етказилган зарар миқдори бир миллиард сўмга яқин эканини маълум қилди. У ёниб кетган уйни тиклашга иложи борича ёрдам беришини қайд этди.
Ҳодиса жойига «Ҳудудгаз» Самарқанд газ филиали директори Олим Исоқулов ҳам келди. Унинг фикрича, моддий зарарнинг асосий қисми пудратчи томонидан қопланиши керак.
Таъкидланишича, Саида Сатторованинг уйи яқин икки ой ичида тўлиқ тикланади.
Бундан аввал Сергелидаги омборхоналардан бирида газ портлаши оқибатида бир киши ҳалок бўлгани, ушбу тумандаги новвойхона ва ошхонада ёнғин содир бўлгани ҳамда Қўқонда бир-бирига туташ 5 та хонадонда ёнғин содир бўлгани ҳақида хабар берилганди.
Изоҳ (0)