UFC’даги 3-жангини ўтказадиган Заррух Адашев, Токиога ўзи билан ош олиб кетган ўзбекистонлик спортчилар ва Мбаппега катта мукофот таклиф қилган «Реал». Энг сўнгги спорт янгиликлари

Дунё ва ўзбек спортига оид 31 июль кунининг муҳим хабарлари дайжести билан танишинг.

Ўзбекистон

Токиода бўлиб ўтаётган Олимпия ўйинларининг саккизинчи кунги баҳслари ортда қолди. Баҳсларда икки нафар нафар ўзбекистонлик спортчи иштирок этди. Шунингдек, дзюдо бўйича Ўзбекистон терма жамоаси баҳсларга киришди. Боксчилар Шаҳобиддин Зоиров ва Элнур Абдураимов 1/4 финалга йўл олган бўлса, Мухтасар Тоҳирова ўқ отиш бўйича Олимпиадани 30-ўринда якунлади. Дзюдочилар эса Нидерландия терма жамоасига мағлуб бўлиб, дастлабки босқичдаёқ мусобақа билан хайрлашди.

Ўзбекистон футзал миллий терма жамоаси Таиланд мезбонлик қилган Continental халқаро ўртоқлик мусобақасида 3-ўринни эгаллади. Умумий ҳисобда 8 та жамоа иштирок этган мусобақанинг гуруҳ босқичидан иккинчи ўрин билан чиққан Баҳодир Аҳмедов шогирдлари ярим финалда Эрон вакиллари билан тўқнаш келди ва 5:7 ҳисобида енгилди. 3-ўрин учун кечган ўйинда эса ўзбекистонлик футзалчилар Мисрни 4:0 ҳисобида таслим этди.

Олимпия ўйинларида иштирок этаётган ўзбекистонлик спортчилар ўзи билан бирга 500 банка ярим тайёр қадоқланган ош ва 200 тача нон олиб кетган, дея ёзади Россиянинг «ТАСС» нашри.

«Биз ўзимиз билан палов олиб келдик, Самарқандча ва анъанавий. Ҳаммаси бўлиб 500 га яқин банка. 200 тача нон ва мол гўшти ҳам. Биз Олимпия қишлоғидаги бошқа спортчиларга ҳам илиняпмиз. Мисол учун, яқинда рус спортчиларига бир нечта нон бердик», – дейди «ТАСС» билан суҳбатда бўлган Ўзбекистон делегацияси вакили.

Ўзбекистонлик UFC жангчиси Заррух Адашев 1 август тонгида промоушендаги учинчи жангини ўтказади. Унга Райан Бенуа рақиблик қилади. Адашевнинг жанги 03:20 лар атрофида старт олиши кутилмоқда.

Жаҳон

«Реал» Килиан Мбаппенинг эркин агент сифатида Мадридга келиши учун 40 миллион евро бонус бермоқчи. Бу ҳақда Marca хабар берди. Ҳозирда «ПСЖ» ва «қироллик клуби» футболчи борасида музокара ўтказмоқда. Мбаппенинг парижликлар билан амалдаги шартномаси 2022 йилда ўз ниҳоясига етади.

Мбаппе «ПСЖ» билан янги шартнома имзолашни хоҳламаётган бир вақтда «Реал» футболчи агар жамоага эркин агент мақомида келадиган бўлса, унга 40 миллион евро миқдорида кўтарма пули ваъда қилган.

Дик Адвокат Ироқ терма жамоаси бош мураббийи этиб тайинланди. У ушбу лавозимда словениялик мутахассис Сречко Катанецнинг ўрнини эгаллайди. Адвокат мураббийлик фаолияти давомида Нидерландия, БАА, Жанубий Корея, Бельгия каби жамоаларни бошқарган.

«Барселона» Антуан Гризманн ва Филиппе Коутиньони жамоада олиб қолмоқчи. Mundo Deportivo хабарига кўра Каталонлар бош мураббийи Рональд Куман уларга ишонч билдирмоқчи. Нидерландиялик мутахассис келаси мавсумда ҳар иккала футболчи жамоада муҳим рол ўйнайди деган фикрда.