Yaponiyaning Tokio shahri mezbonlik qilayotgan Olimpiya o‘yinlarida o‘zbekistonlik sportchilar 31-iyul kungi chiqishlarini yakunladi.
Dzyudo
Yakkalik bahslari yakunlangach, 31-iyul kuni aralash jamoaviy bellashuvlar o‘tkazildi. Dastlabki bosqichda o‘zbekistonlik sportchilarga Niderlandiya terma jamoasi to‘qnash keldi. Bellashuvlar Bekmurod Oltiboyevning (+90 kg) ishonchli g‘alaba bilan boshlandi. Beshinchi jangga kelib Davlat Bobonov masalani hal qilishi mumkin edi, biroq terma jamoaning eng kuchli vakillaridan biri kutilmaganda raqibiga imkoniyatni boy berib qo‘ydi.
Foto: Getty Images
Asosiy bahslarda hisob 3:3 ko‘rinishini oldi. Qo‘shimcha jangda ishtirok etish mas’uliyati Oltiboyev zimmasiga tushdi. Bekmurod bu safar raqibini taslim qila olmadi: O‘zbekiston vakili uchta shido olgach, Niderlandiyaga g‘alaba yozildi. Shu tariqa o‘zbekistonlik dzyudochilarning Olimpiadadagi ishtirokiga rasman yakun yasaldi.
Boks
Rio—2016 Olimpiadasi chempioni Shahobiddin Zoirov (-52 kg) 1/8 finalda Kabo-Verde vakili Varela Danielga qarshi ringga ko‘tarildi va ishonchli g‘alaba bilan chorak finalga chiqdi. Uning keyingi bosqichdagi raqibi filippinlik Karlo Paalam bo‘ladi. Jang 3-avgust kuni o‘tkaziladi.
Foto: Getty Images
-63 kg vazn toifasida O‘zbekiston sharafini himoya qilayotgan Elnur Abduraimov 1/8 finalda tojikistonlik Bahodur Usmonovga qarshi jang qildi. Unda Elnur 5:0 hisobidagi g‘alaba orqali keyingi bosqichga yo‘l oldi. Chorak finalda Aduraimovni armanistonlik kuchli bokschi Hovhannes Bachkovga qarshi jang kutib turibdi. Bu bellashuv ham 3-avgust sanasiga belgilangan.
O‘q otish
Muxtasar Tohirova 50 metrdan 3 holatda o‘q otish dasturida o‘z ishtirokini o‘tkazdi. O‘zbekistonlik sportchi uchala dasturda umumiy 1155 ochko to‘plab, 37 sportchi orasida 30-o‘rinni egalladi va final bosqichiga yo‘llanma ola bilmadi.
Foto: MOQ
Shu tariqa Tohirova uchun ham Olimpiya o‘yinlari yakunlandi. Avvalroq u 10 metr masofada o‘tkazilgan musobaqada ham ishtirok etgandi.
