Аляска қирғоқбўйи ҳудудларида 29 июль, пайшанба куни юз берган зилзила Шимолий Америкада 1964 йилдан буён қайд этилган энг кучлиси бўлди, деб ёзади «РИА Новости».
Ер юзасидаги тебранишлар ушбу қитъада сўнгги 57 йил ичидаги энг кучлисига айланди. АҚШ Геология хизмати аниқлик киритишича, ерости силкинишлари магнитудаси 8,2 га етган. Ундан кейин кўплаб афтершоклар содир бўлган.
«2021 йил 29 июль куни (маҳаллий вақт билан 28 июль) Алясканинг Перривилл манзилгоҳидан жануби-шарқда 8,2 магнитудали зилзила юз берди, бу Тинч океани ва шимолий минтақалар ўртасидаги субдуксия зонаси чегарасида ёки унинг яқинида ёрилиб сурилиш натижасида содир бўлди», — дейилади хабарда.
Зилзиладан кейин Аляска ҳамда Алеут ороллари қирғоқлари учун цунами хавфи эълон қилинган эди, кейинроқ эса у бекор қилинди.
Шимолий Америка ҳудудида энг кучли зилзила 1964 йил Эҳтиросли жума куни юз берган бўлиб, у Буюк Аляска зилзиласи деб аталади. У Алясканинг энг йирик шаҳрида, штат марказий қисмининг жанубида, Кук кўрфази қирғоғида қайд этилган эди. Зилзила ўчоғи 20 километрдан зиёд чуқурликда, Тинч океани плитасининг Шимолий Америка плитасига чўкиш чегарасида жойлашган эди.
1964 йилги 9,2 магнитудали зилзила Анкориж шаҳрини вайронага айлантириб, цунамини чақирган. Ўшанда цунами Аляска, АҚШнинг ғарбий қирғоқлари ва Гавайига ёпирилган. Табиий офат оқибатида 250 дан ортиқ одам ҳалок бўлган.
Аляска Тинч океанининг вулқонли оловли ҳалқасида жойлашган. Аляска ярим оролидан жанубий Калифорниягача бўлган бутун тоғли ҳудуд вулқон фаоллиги юқори бўлган зона ҳисобланади, шунинг учун ушбу ҳудудлар учун зилзилалар камёб ҳодиса эмас.
Изоҳ (0)