Ижтимоий тармоқларда Самарқанд вилоятининг Ургут туманида қишлоқ аёлларини ҳақоратлаган эркакнинг уйи олдида фуқаролар тўплангани тасвирланган видеолар тарқалди. Вилоят ИИБ ахборот хизматининг маълум қилишича, ушбу шахсга нисбатан қамоқ эҳтиёт чораси қўлланилган.
Маълумотларга кўра, 21 июль куни Ургут тумани «Дўстлик» маҳалласида яшовчи Ш.Ш. исмли 32 ёшли фуқаро Telegram’даги гуруҳга унинг аъзоларини ҳақоратлаган видеомурожаатини жойлаштириб, фуқароларнинг шаъни ва қадр-қимматини беодоблик билан қасддан таҳқирлаган.
Ҳақоратли видеони кўрган гуруҳдаги айрим фуқаролар Ш.Ш. ҳақоратли сўзлари учун кечирим сўрашини талаб қилиб, унинг яшаш хонадонига борган.
Ҳолат юзасидан туман ИИБ ҳузуридаги Тергов бўлими томонидан Жиноят кодексининг 140-моддаси (ҳақорат қилиш) 2-қисми билан жиноят иши қўзғатилиб, фуқаро Ш.Ш.га нисбатан қамоқ эҳтиёт чораси қўлланилган. Ҳозирда дастлабки тергов ҳаракатлари олиб борилмоқда.
Фуқаро Ш.Ш. маст ҳолатда қилган ишидан пушаймонлигини билдириб, аҳолидан кечирим сўраган.
Шунингдек, Ш.Ш.нинг яшаш манзилига келиб, жанжал кўтарган барча фуқароларнинг шахсига аниқлик киритилган. Жамоат тартибини бузган ҳар бир фуқаронинг ҳаракатларига қонуний тартибда баҳо берилади.
«Шу ўринда ўзбошимчалик билан қонунда белгиланмаган тартибда бошқа бир фуқарони ‘самосуд’ қилиш ёки шу каби ҳаракатларга уриниш жиноий жавобгарликни келтириб чиқаришини эслатиб ўтамиз», — дейилади хабарда.
Изоҳ (0)