Ўзбекистон Президенти сайловида карантиндаги шахслар ёки вирусга чалинган беморлар қай тартибда иштирок этади? МСК раиси жавоб берди

Аввалроқ хабар қилинганидек, Марказий сайлов комиссиясининг 23 июль, жума куни бўлиб ўтган навбатдаги йиғилишида Ўзбекистон Президенти сайлови кампаниясига старт берилди.

Ушбу йиғилишда ташкил этилган матбуот анжуманида Марказий сайлов комиссияси раиси Зайниддин Низомхўжаев журналистларнинг саволларига жавоб қайтарган.

Жумладан, у пандемия шароитида шифохоналарда коронавирусдан даволанаётган беморлар сайловдаги иштироки қандай таъминланади, карантинга олинган фуқаролар сайлов участкаларига чиқиб иштирок этадими ёки уларнинг уйларига келишадими, деган саволга ҳам изоҳ берган. Раиснинг сўзларига кўра, бундай ҳолатларда қандай йўл тутилиши борасидаги изоҳ кейинги мажлисларда қабул қилинадиган махсус йўриқномада ўз аксини топади.

Сайлов ташкил этиш борасида пандемия ёки касалланиш туфайли касалхоналарда ётган, уйида ёки махсус карантин ҳудудлари, тақсимлаш марказларида карантинда бўлган юртдошларимизнинг конституциявий ҳуқуқини таъминлаш борасида ана шу йўриқномада ўз изоҳини топган.Олдинга ўтиб айтадиган бўлсам, сайлов участкаси комиссиясининг 2 нафар аъзоси тиббиёт ходимлари иштирокида махсус ҳимоя кийимлари билан коронавирус ёки бошқа касалланиш туфайли касалхоналарда ётган беморларнинг ёнига бориб, карантин қоидалари, йўриқномада белгиланган қадам-бақадам амалга ошириладиган ишлар асосида уларнинг сайлов ҳуқуқлари таъминланади. Оғир аҳволда бўлмаган, аммо коронавирус инфекцияси билан касалланган фуқароларнинг ҳам уйларига ташриф буюриб, кўчма қутилар билан уларнинг овоз бериш ҳуқуқи таъминланади.

Зайниддин Низомхўжаев, МСК раиси

Эслатиб ўтамиз,  тадбирда тегишли қарор қабул қилиниб, сайлов куни этиб 24 октябрь санаси белгиланди. Мазкур сайловларда 5 та партия – «Адолат» СДП, «Миллий тикланиш» ДП, ЎзЛиДеП, ХДП ва Ўзбекистон Экологик партияси ўз номзодини илгари суриш ҳуқуқига эга.