Тошкент шаҳрининг Янгиҳаёт туманида фуқаронинг хориждаги ўқишини Ўзбекистондаги олийгоҳга кўчиртириб беришни ваъда қилган шахс қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Янгиҳаёт туман бўлими томонидан тезкор тадбир ўтказилган. Тадбирда Ш.Т. исмли шахс фуқаро Ш.нинг ишончига кириб, унга Қозоғистоннинг Чимкент шаҳрида жойлашган тиббиёт институтининг 1-босқичини тамомлагани тўғрисида ҳужжатларни расмийлаштириб беришни ваъда қилгани аниқланган. Шунингдек, у кейинчалик фуқаронинг ўқишини танишлари орқали Самарқанд давлат тиббиёт институтига кўчиртириб беришини айтган ва бунинг эвазига 5 минг долларни фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бухорода фуқарони ўқишга киритишни ваъда қилиб, 60 млн сўм сўраган икки талаба ушлангани, Сурхондарёда талабаларни 5,4 миллион сўмга чув тушириб кетган шахсга нисбатан жиноий иш қўзғатилгани, Тошкентда фуқарони жисмоний тарбия университетига ўқишга киритиб қўйиш учун 7 минг доллар сўраган ўқитувчи қўлга олингани ҳамда Сурхондарёда талабанинг ўқишини Қозоғистондан Ўзбекистонга кўчириб бериш учун 15,6 миллион сўм ва 300 доллар сўраган шахс ушлангани ҳақида хабар берилганди.
Изоҳ (0)