Ijtimoiy tarmoqlarda Samarqand viloyatining Urgut tumanida qishloq ayollarini haqoratlagan erkakning uyi oldida fuqarolar to‘plangani tasvirlangan videolar tarqaldi. Viloyat IIB axborot xizmatining ma’lum qilishicha, ushbu shaxsga nisbatan qamoq ehtiyot chorasi qo‘llanilgan.
Ma’lumotlarga ko‘ra, 21-iyul kuni Urgut tumani “Do‘stlik” mahallasida yashovchi Sh.Sh. ismli 32 yoshli fuqaro Telegram’dagi guruhga uning a’zolarini haqoratlagan videomurojaatini joylashtirib, fuqarolarning sha’ni va qadr-qimmatini beodoblik bilan qasddan tahqirlagan.
Haqoratli videoni ko‘rgan guruhdagi ayrim fuqarolar Sh.Sh. haqoratli so‘zlari uchun kechirim so‘rashini talab qilib, uning yashash xonadoniga borgan.
Holat yuzasidan tuman IIB huzuridagi Tergov bo‘limi tomonidan Jinoyat kodeksining 140-moddasi (haqorat qilish) 2-qismi bilan jinoyat ishi qo‘zg‘atilib, fuqaro Sh.Sh.ga nisbatan qamoq ehtiyot chorasi qo‘llanilgan. Hozirda dastlabki tergov harakatlari olib borilmoqda.
Fuqaro Sh.Sh. mast holatda qilgan ishidan pushaymonligini bildirib, aholidan kechirim so‘ragan.
Shuningdek, Sh.Sh.ning yashash manziliga kelib, janjal ko‘targan barcha fuqarolarning shaxsiga aniqlik kiritilgan. Jamoat tartibini buzgan har bir fuqaroning harakatlariga qonuniy tartibda baho beriladi.
“Shu o‘rinda o‘zboshimchalik bilan qonunda belgilanmagan tartibda boshqa bir fuqaroni ‘samosud’ qilish yoki shu kabi harakatlarga urinish jinoiy javobgarlikni keltirib chiqarishini eslatib o‘tamiz”, — deyiladi xabarda.
Izoh (0)