Жорий йилнинг 20 июль куни Наманган вилояти ҳудудида ёғган кучли жала оқибатида Наманган шаҳрининг Давлатобод туманидаги айрим хонадонлар ҳам жиддий зарар кўрди. Бу ҳақда «Дарё» мухбири Азизбек Абдувалиев хабар бермоқда.
Туманнинг «Юксалиш» маҳалласида жойлашган 3 та кўп қаватли уй ертўласида сув тўпланганлиги сабабли бу уйларда яшовчи 100 нафар фуқаро хавфсиз ҳудудга эвакуация қилинган.
Ҳозирда ертўлаларда тўпланган сувларни ёнғин-қутқарув автомобиллари ва сув тортиш насослари — мотопомпалар орқали тортиш чоралари кўрилмоқда.
Шунингдек, туманнинг «Елихон» маҳалласи ҳудудидан оқиб ўтувчи Шишаки сойи яқинида жойлашган 7 та хонадондаги 32 нафар фуқаро ҳам хавфсиз ҳудудга эвакуация қилинган.
Эвакуация қилинганларга бошпанадан ташқари кийим-бош ва иссиқ овқат берилгани айтилмоқда.
«Юксалиш» маҳалласидаги уйлари ва томорқаларини сув босган хонадонларда турли юқумли касалликлар тарқалишининг олдини олиш мақсадида Давлатобод туман санитария-эпидемиологик осойишталик ва жамоат саломатлиги бўлими томонидан дезинфекция ишлари олиб борилмоқда.
Изоҳ (0)