Наманганда «мойка»даги карчер аппаратини ўғирлаган 27 ёшли фуқарога жиноят иши қўзғатилди

Наманган вилояти Янгиқўрғон туманида автомобилларни ювиш шохобчасида ўғрилик содир этган шахс аниқланди, деб хабар беради вилоят ИИБ ахборот хизмати.

Маълум қилинишича, Янгиқўрғон туманида яшовчи 23 ёшли фуқаро ариза билан мурожаат қилиб, шу кунга ўтар кечаси маҳалласи ҳудудида жойлашган автомашиналарни ювиш шохобчасида ўғрилик содир этилганини билдирган.

Номаълум шахс, эшиклари очиқ қолганидан фойдаланиб, шохобчадан 700 долларлик автомашина ювиш учун мўлжалланган аппаратини (карчер) ва нархи 150 долларлик кўпик сепиш аппаратини ўғирлаб кетган.

Янгиқўрғон туман ИИБ ЖҚБ бошлиғи томонидан олиб борилган тезкор-қидирув ва суриштирув ҳаракатлари натижасида, ушбу жиноятни Янгиқўрғон туманида яшовчи 1994 йилда туғилган фуқаро содир этгани аниқланган.

Ушбу ҳолат бўйича Янгиқўрғон туман ИИБ ҳузуридаги Тергов бўлими томонидан 17 июль куни Жиноят кодексининг 169-моддаси (ўғрилик) 1-қисми билан жиноят иши қўзғатилган.

Аввалроқ Фарғонада «мойка» ходими Жиззахдаги севган қизини кўргани бориш учун ўзганинг Lacetti’сини миниб қочгани тўғрисида хабар берилганди.