Joriy yilning 20-iyul kuni Namangan viloyati hududida yog‘gan kuchli jala oqibatida Namangan shahrining Davlatobod tumanidagi ayrim xonadonlar ham jiddiy zarar ko‘rdi. Bu haqda “Daryo” muxbiri Azizbek Abduvaliyev xabar bermoqda.
Tumanning “Yuksalish” mahallasida joylashgan 3 ta ko‘p qavatli uy yerto‘lasida suv to‘planganligi sababli bu uylarda yashovchi 100 nafar fuqaro xavfsiz hududga evakuatsiya qilingan.
Hozirda yerto‘lalarda to‘plangan suvlarni yong‘in-qutqaruv avtomobillari va suv tortish nasoslari — motopompalar orqali tortish choralari ko‘rilmoqda.
Shuningdek, tumanning “Yelixon” mahallasi hududidan oqib o‘tuvchi Shishaki soyi yaqinida joylashgan 7 ta xonadondagi 32 nafar fuqaro ham xavfsiz hududga evakuatsiya qilingan.
Evakuatsiya qilinganlarga boshpanadan tashqari kiyim-bosh va issiq ovqat berilgani aytilmoqda.
“Yuksalish” mahallasidagi uylari va tomorqalarini suv bosgan xonadonlarda turli yuqumli kasalliklar tarqalishining oldini olish maqsadida Davlatobod tuman sanitariya-epidemiologik osoyishtalik va jamoat salomatligi bo‘limi tomonidan dezinfeksiya ishlari olib borilmoqda.
Izoh (0)